Ne’e duni, eis-prezidente repúblika ne’e husu atu bele kriminaliza ema sira ne’ebé uza média sosiál ho intensaun atu hatún no persege lider sira.

Ministru Estadu Konselleiru Seguransa Nasionál ne’e hahú atu estuda halo maneja, nune’e identifika ema sira ne’ebé subar-aan iha média sosiál halo propaganda hafahe lider nasionál sira.

“Ne’e ami nia responsabilidade atu estuda depois halo jestaun ba ida ne’e, kualkér polítika no asaun ne’ebé ita halo labele fó impaktu ba liberdade imprensa”, dehan Horta, iha Palásiu Governu, horisehik.

Nia dehan, ema sira ne’ebé subar-aan iha média sosiál ne’e sempre halo propaganda hodi fahe povu no lider nasionál sira atu monu ba lasu sira ne’ebé sira halo kampaña negra.

Horta dehan, Governu hahú buka dalan atu halo jestaun no manajementu hodi identifika, nune’e buka tuir ema sira ne’ebé hakarak subar-aan iha média sosiál hodi hatún lider nasaun nian halo kampaña negra iha média sosiál.

Bainhira identifika ema sira ne’ebé halo propaganda no trata lider nasionál sira tenke hataan prosesu ba justisa.

Tanba ne’e, eis-ministru negósiu estranjeiru ne’e hakarak implementa tuir país dezenvolvidu sira liuliu Brazíl, Estadus Unidus Amérika (EUA) no nasaun seluk ne’ebé hahú kombate identidade falsu sira. Husu ba Estadu Timor tenke buka meiu hodi kombate hahalok pesoál balun uza medsos trata no fahe lider nasionál sira.