Diretór Ezekutivu Luta Hamutuk, José Alves da Costa hatete, inisiativa husi Autoridade Munisipiu Dili (AMD) atu kria regra ne’e di’ak.
Tanba, tuir nia, loloos fatin hakoi mate-isin ne'ebé estadu prepara, liu-liu iha kapitál Dili, hanesan iha Kakaulidu, Bekusse no Santa Kruz, tenke regula no rate ne’e ho dezeñu ida atu ema ida labele halo rate okupa espasu boot.
“Tenke regula, standar (rate) ne'e halo nusa, atu ema haree rate ne'e iha organizadu, ne'ebé labele pinta arbiru de'it tuir nia gostu, labele halo fali andar, uma iha leten, monta listrik ketak-ketak, ha'u hanoin ida ne’e presiza hadia duni," dehan José ba jornalista Jornál INDEPEDENTE, iha nia kna'ar fatin, Faról, Segunda (24/06).
Nia hatutan, ba rate iha semiteriu ne’ebé estadu prepara, tenke iha ninia estandarizasaun. Enkuantu ba rate sira ne'ebé família rasik prepara iha sira-nia knua, ne’e depende sira.
"Ita bainhira haree didi'ak hanesan rate sira ne'ebé iha Metinaru, Eróis da Pátria ninian ne'ebá, ne'e modelu di'ak, loloos ida ne'e bele aplika mós ba iha semiteriu sira seluk,” dehan nia.
Iha fatin ketak, Vise Diretór dahuluk Asosiasaun HAK, Antonino de Limas apresia ba hanoin husi AMD kona-ba regra oinsá hakoi mate-isin iha semiteriu.
"Ha'u hanoin ne'e hanoin di'ak tanba ne'e ligadu ho kestaun espasu rai ne'ebé estadu prepara limitadu. Rate sira ne'e balun ho andar depois la organiza ho didi'ak, la kleur ne'e nakonu lalais,” dehan nia.
Nia fó ezemplu, Jardim Eróis sira ne'e nia medida kuaze hanesan hotu, nune’e bele aplika mós ba semiteriu públiku sira.
"Ha'u hanoin bainhira inistiva mosu ne'e tenke tama ho oinsá atu implementa, se iha ona hanoin di'ak hanesan ne'e presiza halo dezeñu ne'ebé di'ak," katak nia.
Molok ne’e, Prezidente Autoridade Munisípiu Dili, Gregorio Saldanha ‘Mouris’ hatete, daudaun ne’e AMD prepara hela regulamentu ba familia sira bainhira atu hakoi sira-nia membru ne’ebé lakon vida.
"Regulamentu sira ne'e mak hanesan medida bainhira hakoin mate, rate nia medida hotu tenke hanesan, labele balun andar no balun baibain," dehan Mouris ba Jornalista sira, iha Tasi-Tolu, Sesta (21/06).
Maibé, nia hatutan, regulamentu sira ne'e AMD sei prepara hela, no bainhira finaliza ona sei fó sai ba públiku.
