Organizasaun Naun-governamental (ONG) Asia Justice And Rights (AJAR) no Asosiasaun HAK husu ba Parlamentu Nasionál (PN) atu fizkaliza osan ne’ebé governu gasta ba preparasaun vizita Amu Papa mai Timor-Leste.

Peskizadór AJAR, Inocencio de Jesus Xavier husu ba PN atu halo fiskalizasaun urijensia ba projetu hirak ne’ebé implementa.

"Ba ami husu Parlamentu Nasionál atu halo fiskalizasaun ida urijensia ba iha projetu ne'e no osan $12 millaun ne'e, nune’e bele garante buat ida governasaun di'ak no kualidade projetu," dehan Inocencio ba Jornalista INDEPEDENTE iha nia kna'ar fatin, Faról, Kuarta (21/08).

Tuir nia, kualidade husi governasaun ne’e depende mós ba kapasidade Parlamentu Nasionál. Se PN laiha kualidade, governu mós sei sabraut.

PN mak hamoris governu, entaun PN tenke forte iha fiskalizasaun, iha kbiit no koñesimentu di'ak atu bele haree orsamentu sira ne'ebé governu foti tama duni iha lójika ka la'e.

"Ha'u hein katak osan ida gasta ba vizita Amu Papa Francisco mai Timor-Leste ne'e tenke iha relatóriu ida klaru, projetu sira inventadu iha Dili laran ne'e bele garante nia kualidade ba oin.”

“Osan povu nian, se osan povu nian tuir programa ida projetu PFMO ‘osan povu nian jere ho di'ak’, ita la jere ho di'ak signifika ita lori povu ne'e ba rai kuak, ita oho ita-nia oan sira-nia futuru. Ba oin ita-nia oan sira sei servisu maka'as atu selu impostu, saláriu, selu polítiku, direitór sira, polísia, forsa armada sira, profissionál saúde sira, sira mak sei selu. Povu Maubere nia oan ne'ebé moris injustisa nia laran ne'e mak sei selu," dehan Inocencio.

Iha sorin seluk, Vise Direitór Dahuluk Asosiasaun HAK, Antonino de Limas hatete, tanba osan ne’e estadu no povu nian, PN tenke ezerse nia papel fiskalizasaun.

"Ita husu ba deputadu sira tau-matan ba asuntu ida ne'e, halo fiskalizasaun didi'ak, tanba uza povu nian osan barak, ita lakohi eventu ho osan númeru boot hanesan ne'e gasta la tuir nia dalan,” dehan nia.

Tuir nia, governu, liu-liu Komisaun Organizadora ba vizita Amu Papa, tenke relata osan tokon $12 ne’e gasta ba saida de’it, bainhira eventu ne’e remata.

“Orsamentu ba vizita Papa Francisco nian ne'e di'ak liu hato'o ba públiku, presiza hatene utiliza ba saida de'it, bainhira eventu hotu husi $12 millaun ne'e hira mak uza,” dehan nia.