Ministra Saúde (MS) Elia A. A. dos Reis Amaral hatete, Diretora Rejionál Organizasaun Mundiál Saúde (OMS) bá Rejiaun Sudeste Aziátiku, Saima Wazed ne’ebé foin hetan nomeasaun iha loron 1 Novembru 2023, hasoru-malu ho Primeiru-Ministru (PM), Kay Rala Xanana Gusmão hodi atualiza ninia roteiru ka planu hakarak atu kontinua lori saúde bá inan-feton sira no mós ema vulnerável sira iha rejiaun ne’e.
Nia dehan, durante enkontru relata mós kona-bá apoiu sira ne’ebé durante ne’e OMS oferese mai Timor-Leste (TL).
“Nia foin hetan nomeasaun hanesan rejionál diretora no mai ho ninia roteiru rasik, prinsipál liu oinsá atu lori saúde ba inan-feton sira, labarik feto, adolesente inklui populasaun vulnerável sira,” dehan Ministra liu husi Komunikandu GPM ne’ebé Online INDEPEDENTE asesu, Sesta (23/08).
Primeiru-Ministru agradese tebes bá OMS ne’ebé halo kontribuisaun barak liu hosi ninia reprezentante iha Timor-Letse no iha tempu badak OMS sei fó apoiu bá oxygen plan ne’ebé sei lansa iha Hospital Nasionál Guido Valadares (HNGV).
Reprezentante OMS rejionál ne’e iha planu kona-bá saúde eskolár no sei vizita bá eskola 300-resin iha Timor laran tomak. Nune’e, Ministériu Saúde ho Ministériu Edukasaun (ME) mós sei asina memorandu entendimentu konjunta atu hadi’a di’ak liu-tán prestasaun ba programa saúde eskolár.
