Diretór Nasional Tékniku Vokasional Fernando Gama hatete, bolseiru sira ne’ebé atu ba kontinua estudu Malaka Indonesia antes ne’e iha ona koordenasaun entre inan-aman ho governu interior, tan ne’e ME kontinua implementa akordu ne’ebé iha ona.

“Ohin ita halo pelepasan, ho ita-nia estudante sira ne’ebé atu eskola iha Malaka ne’ebá, ne’ebé hetan bolsu estudu iha koordenasaun entre inan-aman ho eskola, no eskola ne’ebé sira ba ne’e bolu eskola kejuruan Santa Genoveva Malaka, ne’e para oinsa banhira sira eskola hotu hetan skiil rum abele fila mai ita nia rai, maibé ida ne’e halo ona akordu governu interior,” dehan Diretór iha sala konferensia ME Vila Verdi, Sesta (23/08).

Diretór Nasional ne'e , husu ba bolseiru sira tenki eskola no estuda didiak tanba sira dook husi inan-aman sira, tenki uza teknolojia tuir nia dalan.

No banhira hasoru problema ruma tenki halo komunkasaun ba inan-aman sira nune’e bele hamutuk ho Ministeriu bele rezolve hodi labele fó impaktu ba sira nia estudu.

Reprezentante Embaixadór Indonézia iha Timor-Leste, Phil Ikhfan Haris hatete, programa bolso estudu ba estudante sira iha area tékniku vokasionál hosi Governu Indonezia foin ba dala uluk, tanba antes ne’e loke bolsu estudu ba iha estudante universitáriu de’it.

Tanba ne’e, iha oportunidade hein katak programa kolaborasaun ne’e bele kontinua nafatin.

“Ida ne’e mak ami-nia programa dahuluk husi Governu Indonézia nian klaru ami husu deskulpa depois karik iha buat ruma mak seidauk la’o ho diak tanba ami hakarak hahu dala ida tan. Alin sira ba eskola iha ne'ebé kuandu remata bele kontinua eskola ba universitariu besik ne'ebá di'ak liután. oportunidade ne’e ami hein katak programa kolaborasaun ida ne’e bele kontinua,” dehan reprezentante.

Reprezentante Embaixadór afirma, konserteza bolseiru sei sai susesu ba familia inan-aman sira husi munisipiu no nasaun ida ne’e.

Tan ne’e espera katak programa ida ne’e bele kontinua no programa inisiál ida ne’e sei sai hanesan pontu dahuluk ba posivel kolaborasaun tuir mai.

“Parabéns ba ha’u nia oan sira 12 Ami nia orasaun nafatin akompaña imi, ba eskola didiak no susesu nafatin, espera bele remata estudu ho di'ak durante tinan tolu nee,” katak Nia.

Enkuantu, estudante bolseiru ne’ebé atu ba hala’o estudu iha eskola katólika Santa Gevania Malaka Indonesia hamutuk na’in sanolu resin rua husi munisipiu, Kovalima, Bobonaro, Likisa Ainaro, Dili No Rejiaun Administrativu Espesial Oekusse Ambeno (RAEOA).

No bolseiru sira ne’e halo estudu iha eskola tékninu vokasional iha area Automovel, Hospitalidade no Turizmu.