Dom Virgilio Cardeal do Carmo da Silva hatete, Igreja fó bensaun no inaugura altar Santu ho premiteriu tomak hodi prepara ba iha selebrasaun eukaristia neebé Sua Santidade sei Preside iha loron 10 fulan-Setembro tinan nee.
“Ohin ita Mai hamutuk iha fatin ida nee hodi fó bensaun no inaugura altar Santu ho Perimetru tomak hodi prepara ba iha selebrasaun eukaristia neebé Sua Santidade sei preside iha dia 10 Setembro mai,” dehan Cardeal hafoin remata fó bensaun ba altar Tasi-Tolu, Sesta (23/08).
Dom Virgílio lori Bispu sira-nia naran no mós sarani sira-nia naran hakarak agradese bá governu, Xefia hosi Primeiru-Ministru, Kay-Rala Xanana Gusmão ne'ebé ho laran luak prepara fatin ida neebé furak tebtebes, no sai fatin santu atu hasoru-malu ho Santu Padre.
“Ita bele dehan vizita Papa nian nee sai duni grasa ida ba ita sarani, bá ita povu Timor ninian. Dala ida tán Tasi-tolu transforma sai hanesan fatin bá ema hotu-hotu. Mai ita reza atu Maromak bele rekompensa sakrifísiu neebé mak sira halo hodi halo fatin nee nakfilak sai fatin furak bá ita hotu. Mai ita prepara an isin no klamar bá hasoru momentu istóriku ida-nee, hasoru Papa Francisco,” Arsebispu ne'e hateten.
Primeiru-Ministru (PM), Kay-Rala Xanana Gusmão konsidera vizita Papa iha loron 9 too 11 fulan Setembru tinan 2024, marka duni istória bá nasaun Timor-Leste (TL).
Xefe Governu ne'e dehan, Marka istória, tanba iha Papa na'in-rua mak vizita ona nasaun ne'e, hodi lori esperansa no hametin mentalidade Timor-oan sira nian.
“Marka duni istória bá Timor-Leste tanba segunda vizita Papa ida mai Timor. Papa João Paulo II mai iha tempu neebé difísil atu enkoraza ita. Agora Papa Francisco mai atu husu bá Timor oan sira tomak atu hadia ita-nia mentalidade, hodi haree bá importánsia rai nee no povu ninia interese. Sira mai hanorin ita kona-bá pás no não violénsia,” Primeiru-Ministru hateten.
Iha biban nee, líder nasionál konvida Timoroan hotu atu prepara-an, husu atu reza nafatin bá Maromak nune'e labele akontese buat ida durante vizita nee.
Xefe Governu agardese bá Cardeál ne'ebé fó ona bensaun bá fatin nee, husu bá ema hotu-hotu atu hamutuk tau-matan bá fatin ne'e.
Ministru Administrasaun Estatál (MAE), Tomas do Rosário Cabral agradese bá parte hotu-hotu ne'ebé kontribui ona bá preparasaun, liu-liu sira ne'ebé involve direta iha kontrusaun hanesan Ajénsia Dezenvolvimentu Nasionál (AND), Ministériu Obras Públikas (MOP), Eletrisidade Timor Leste (EDTL) no seluk tán.
Tomas Cabral hatutan, agora daudaun seguransa tau-matan hela bá altar nee tanba mobilizasaun sasan barak sei mai no hahú aban delegasaun sei mai halo inspesaun too loron 29 Agostu mak foin submete relatóriu.
Marka prezensa iha serimónia bensaun bá altar misa nee, membru Governu balun, reprezentante Santa-Sé iha Timor-Leste, Monseñor Marco Sprizzi, Padre, Madre no sarani balun.
