Komandante Tarefa Konjunta PNTL Superintendente Xefe Polísia José Soares hateten misa sonele iha loron 10 fulan Setembru hamutuk ho Amu Papa Francisco iha Tasi-Tolu, molok tama ba iha laran Autoridade Konjunta sei pasa revista iha pontu Entrada rua ida iha rotunda Presidente Nicolau nian no ida seluk iha selamat datan husi tibar tama mai Tasi-Tolu.
"Sarani hotu atu tama ba Tasi-Tolu tuir misa solene liu iha pontu entrada rua ne'e ita iha polísia ho seguransa regulamentar Igreja nia sei pasa revista ba sira molok tama iha tasi tolu inklui komunidade ne'ebé hela iha Tasi-Tolu rasik tuir misa ita halo hotu revista atu asegura ema hotu mai tuir misa ne'e ho seguru no livre," dehan José ba Jornalista sira iha area Tasi-Tolu (21/08).
Nia dehan, sarani membru Governu ho Parlamentu sira ne'ebé tuir misa iha Tasi-Tolu tenki hahu iha tuku 06:00 to'o 01:00 ema hotu tama ona iha Tasi-Tolu fatin hotu tenki mamuk no hakmatek, tanba ne'e karreta ne'ebé halo movimentu tula sarani no membru Governu ho Parlamentu, ekipa Konjunta seguransa aprezenta ona ba komandu rua atu halo desizaun.
"Desizaun ne'ebé Konsellu Ministru aprova no deside ona katak, iha loron 10/09 tuku 01:00 meudia sarani no ema hotu tenki iha ona fatin Tasi-Tolu no Karreta ne'ebé atu tula sira ita aprezenta ona ba komandu rua atu deside no ami Polísia ho Militár mak sei eskoltu ba membru Governu ho Parlamentu tama ba iha tasi tolu," informa nia.
Nia afirma, fatin iha Tasi-Tolu hahú iha loron 09 to'o 10 kalan Autoridade Konjunta la autoriza ema ruma antes ba okupa fatin molok misa hahú, tanba ne'e PNTL ho F-FDTL hakarak garante seguransa fatin iha Tasi-Tolu tenki seguru.
"Entaun ohin tama ona ba loron daruak ita halo simulasaun ba prepara simu vizita amu papa Francisco mai Timor-Leste, maibé ida ne'e seidauk kompletu, tanba ita seidauk envolve parte saude ho entidade sira ne'ebé iha atu apoiu, durante Vizita Amu Papa Francisco iha Timor-Leste tenki garante seguransa ho di'ak no segredu ba ema hotu nia vida," informa nia.
Nia informa, simulasaun ida ne'e Autoridade Konjunta halo preparasaun antes iha loron 24 to'o 29 Agostu sei aprezenta ba ekipa vatinakanu hodi haree ida ne'ebé mak la di'ak kontinua halo preparasaun prátika simulasaun iha tereinu.
"Agora iha misa sonele iha Tasi-Tolu ne'e ita bandu sarani sira labele lori sasán arma branka sira kompostu husi kanabeti, lamina, tudik, inklui fumador sira labele lori gás, entaun sira mai tuir misa los de'it labele lori fali espanduk atu mai dada iha tasi tolu ida ne'e ita bandu sira, depois ita sei halo avizu fo sai iha media hotu no plataforma média sosial atu ema hotu asiste no kumpri saida mak lori no ida ne'ebé labele lori," Subliña nia.
Nune'e mós iha misa hahú, Autoridade Konjunta bandu ema atu husik kamera Drong, tanba kordena ona ho ANC katak, autoriza de'it ba Autoridade seguransa sira mak bele husik Drong atu kontrola seguransa to'o serimonia misa solene iha Tasi-Tolu remata ho di'ak.
Entretantu Autoridade Konjunta apoiu ba seguransa kompostu husi Polísia Nasionál Timor-Leste PNTL ho FALINTIL-Forsa Defeza Timor-Leste F-FDTL hamutuk ho THS/THM, eskuteiru, soldadu Kristu no Konsellu Polísiamentu Komunitariu (KPK) iha Munisípiu Dili ho Autoridade lideransa Komunitariu hotu.
