Sekretariu Estadu Formasaun Profisional no Empregu Rogerio Araújo Mendonça hatete, tenke identifika traballadór sira ne’ebé sai husi sistema, tanba fó ameasa ba Timor-Leste.
"Sira ne'ebé sai husi sistema agora dadaun governu Korea buka tuir hela hodi deporta, ba maluk sira ne'ebé hakarak sai hosi sistema signifika katak kontrola ne'ebé Governu Korea halo ne’e rigorozu tebes, o uza o nia tlf sira hatene o nia paradeiru, agora falta de’it governu seidauk halo planu ba iha Governu Korea tanba ne’e bainhira governu haruka karata ba iha Governu Korea hakarak ka lakohi sira ne'ebé sai hosi sistema tenki fila," dehan Rogerio iha Salaun Delta-Nova, Segunda (26/08).
Nia hatutan, maske dadaun ne’e governu Timor -Leste seidauk halo karta ruma ba iha governu Korea, maibé iha sistema Korea nian, bainhira traballadór sira hosi nasaun ida mak liu ona pursentu lima nolu (50%) sai hosi sistema maka Governu Korea sei taka nia sistema ba nasaun ne'e rasik.
Tanba ne’e, ho númeru traballador TL nia ne’ebé sai hosi sistema, ba oin sei fó ameasa ba nasaun tanba ne’e governu sei halo asaun ba ida liuhosi haruka karta ba Governu Korea hodi deporta fila-fali mai TL.
Nia afirma, Tanba ida ne’e interese ba nasaun nune’e governu sei halo asaun liuhosi haruka karta ba Governu Korea tanba antes sira atu parte hosi traballadór família ho governu halo ona akordu, tanba hanesan sekretáriu estadu sei halo karta ba iha Governu Korea.
"Ba interese nasaun ita tenke halo tanba sai hosi nasaun Timor-Leste ba nasaun Korea sira asina akordu ho parte sira ho sira-nia família ho governu ne'ebé ha'u la tauk banhira sai ameasa ba nasaun ha’u tenke halo karta ba estadu Korea ida ne'e tenki halo," katak Sekretariu Estadu.
Entertantu semana ne’e, governu korea sei deporta uluk traballadór Timor-oan na’in sanolu resin ida ne’ebé sai ona husi sistema Korea.
Enkuantu, haú husi tinan 2009 to’o 2024, Governu Timor-Leste haruka ona Timor-oan hamutuk 6.674 ba servisu iha Korea Súl no hosi númeru iha traballadór na’in 1.335 mak sai ona hosi sistema.