Tuir Diretór Servisu Munisipal Saúde Manatuto, Arfim Pereira Cárceres hatete, imajen ne’ebé virál iha média sosiál (facebook) nia rekoñese loos katak pasiente raan fakar iha liur maibé, informasaun kona-ba la iha pesoal saude atu atende pasiente refere ne’e laloos.
“Atu informa katak, informasaun ne’ebé espalla iha média sosiál la iha atendimentu husi pesoal saúde ne’e laloos” esplika nia liuhusi via telemovel, Domingo (25/02)
Nia haktuir katak, momentu pasiente Rosa Cardoso husi uma to’o iha Postu Saúde Barique ne’e akompanha husi pesoál saúde, maibe to’o iha Sentru Saúde akontese ran fakar derepente.
“maibé iha kedas parteira ho enfermeira iha oin, tama ba uma laran, loke odamatan foti luvas, ne’e mak ema ne’e hasai foto,” nia haktuir.
Pasiente Rosa Cardoso momentu ne’ebá parteira tolu no enfermeira ida mak atende duni, no halo kedas observasaun iha ne’ebá no bebé ne’e hetan kedas vasinasaun kompletu nune’e sira fila uma.
“Nune’e familia pasiente sira hakarak fila uma ona, entaun prontu sira fila kedas ba uma iha oras 14:45, pesoal saude atende ne’e kuaze iha 11:40 tanba duas oras” nia esplika.
Iha fatin hanesan, Xefe Aldeia Halibur Suku Uma Boco, Julieta hatete, rejeita mós imajen ne’ebé viral iha média sosial facebook katak la iha pesoál saúde atende pasiente Rosa Cardoso.
“di’ak ha’u hakarak klarifika de’it, ohin fó sai iha média ne’e buat ne’e laloos, tanba iha ne’e parteira na’in tolu mak kompletu iha ne’e, hodi halo atendimentu ba ita-nia pasiente ne’e, labarik mós moris kondisaun normal kondisaun mós normál” hatete reprezenta família liuhusi komunikadu iha Postu Saúde Barique Natarbora, Munisípiu Manatuto.
Oras ne’e dadaun pasiente Rosa Cardoso ho bebé nia kondisaun di’ak no familia sira lori fila ona uma.