Tuir Komunikadu Imprensa neebé INDEPENDENTE asesu iha Pájina Sekretáriu Estadu Floresta katak iha loron 25 fevereiru 2024, madrugada oras 3:00, Korpu Guarda Floresta, Munisípiu Lautem, hala'o operasaun iha mota Nama-lutu, Suku Lore I, kaptura komunidade na'in-8 ne'ebé kasa animal fuik, iha área parke nasionál Nino Konis Santana.

Purtantu iha atividade operasaun ne'e, Korpu Guarda Floresta mós prende kilat anin ka kilat manu 4, animal meda hamutuk 16 no niki ida, hafoin kapturasaun Korpu Guarda Floresta lori sidadaun nain-8 hodi prosesu tuir lei ne'ebé vigora iha Konstituisaun Repúblika Demokrátika Timor-Leste (K-RDTL).

Hafoin rona informasaun husi via telefone, Sekretáriu Estadu Florestas (SEF), Fernandino Vieira da Costa, apresia  Korpu Guarda Florestas sira-nia servisu hodi halo prevensaun no asegura balada fuik sira iha área parke nasionál Nino Konis Santana, Munisípiu Lautém.

Sekretáriu Estadu Fernandino informa, baze legál tuir artigu K-RDTL hodi Bandu ba komunidades Timor-Laran tomak, atu labele estraga rekursus  naturais sira.

Sekretáriu Estadu Fernandino esplika, tuir Konstituisaun RDTL artigu 139 kona-ba Rekursus Naturais; Regulamentu UNTAET númeru 19/2000 kona-ba Área Protejida (Bando Casa Animal); Regulamentu UNTAET númeru 17/2000 kona-ba Bandu Tesi ai no eskporta ai sai ba liur; Dekretu Lei númeru 5/2016 kona-ba Sistema Nasionál Área Protejidas iha Timor-Leste no dekretu-lei númeru 14/2017 kona-ba Rejime Jerál Floresta.

“Ita iha ona lei baze legál, lei hirak ne'e maka bandu ba sidadaun hot-hotu, atu labele kasa animal fuik sira, labele  ta ai arbiru liu-liu iha fatin risku sira, impaktu ba rai monu, bai-loron naruk, mosu inundasaun ne'e, tanba attitude umanu ne'ebé laiha konsiensia. Tanba ne'e maka husu ba Timoroan tomak tempu ona para ita proteje rekursu naturais sira-ne'ebé iha,” Dehan Sekretáriu Estadu Floresta, Fernandino Vieira da Costa liu husi Komunikadu Imprensa neebé INDEPENDENTE asesu, iha Domingu (25/2).