Aleinde husu hala’o hikas sira-nia atividade, Tribunal mós deside hodi aplika medida koasaun aprezentasaun periodika fulan ida dala ida ba Ministériu Públiku no eskuadra polisia, proibizaun auzensia, no medida kausaun, ba arguidu ho inisial J, DI no HdC, hodi hein prosesu investigasaun ne’ebé la’o hela.
Desizaun husi tribunal ne’e kaman liu kompara ho alegasaun husi Ministériu Públiku (MP) ne’ebé husu atu aplika pena prizaun preventiva, aprezentasaun periodika no medida kuasaun (osan garantia) ho montante ne'ebé boot ba arguidu sira.
MP promove arguidu sira ho krime Frauda Fiskal ne'ebé previstu iha artigu 314, Krime Bens ka Merkadoria ne'ebé previstu iha artigu 315, 316, 317, 303 no 304 Kodigu Penal.
Defeza husi arguidu sira, Pedro Camoes deklara, Juiz foti medidas mais perigu no ladun perigu. Juiz fó prazu ba arguidu sira atu selu kausaun (tau osan garantia) ho razaun tanba aimoruk balun posibilidade laiha lisensa duni mais barak liu mak iha lisensa.
Razaun seluk, tribunal intende katak klinika ne'e iha relasaun ho ema vida, tanba ema hotu hatene katak iha Timor aimoruk menus, entaun tribunal fó hanoin ba na’in ba klinika atu loke fali sira-nia atividade hodi atende sidadaun sira ne'ebe presiza atu halo tratamentu.
"Tribunal husu ba klinika nain ne'e atu loke fila fali sira-nia klinika, maibé klinika nain ne'e hatete ba tribunal katak ‘ha'u loke mós saugati de’it tanba aimoruk sira ne'e polisia prende hotu’.”
“Tanba ne'e mak hanesan servisu urijente ida ba Prokurador no Polisia sira atu devolve lalais aimoruk (item) 350 ne'e par atu loke klinika ne'e,” dehan defeza hafoin interogariu dahuluk, iha Tribunal, Sabadu (24/02).
Ba desizaun husi tribunal ne’e, nia dehan, desizaun ida ne'e sufisiente duni ba ninia kliente na’in tolu.
Audensia julgamentu ne'e prezide husi Juiz singular, Jose Maria de Aurojo, MP reprezenta husi Prokurador Matias Soares, arguidu sira hetan asistensia legal husi advogadu privadu, Pedro Camoes no Januariu Martins.
Molok ne’e, autoridade seguransa hamutuk ho Diresaun Nasionál Farmásia no Medikamentus, Ministeriu Saude prende aimoruk item 350 husi Klinika Moris Foun tanba konsidera aimoruk hirak ne’e illegal.
Iha loron dahuluk buska no aprensaun, iha 21 Fevereiru 2024, ne’ebé Departamentu Investigasaun Kriminal Nasionál (DIKN), PNTL, hamutuk ho Diresaun Nasionál Farmásia no Medikamentus (DNFM), MS, halo ba Klinika Moris Foun, konsege prende aimoruk item 250.
Iha loron daruak, 22 Fevereiru, autoridade seguransa no DNFM prende tan aimoruk item 100.
Iha loron daruak ne’e, buska no aprensaun hahu iha tuku 09:00 iha klinika Moris Foun iha area Kolmera, hafoin ekipa ba armajen klinika ne’e iha area Villa Verde hodi halo pasa revista.
Maibé, iha armajen ne’e ekipa la deteta aimoruk illegal. Ho nune’e, ekipa fila hikas ba klinika Moris Foun no konsege deteta no prende aimoruk ne’ebé konsidera illegal hamutuk item 100.
Hafoin halibur dokumentu no evidensia balun, ekipa labele kontinua ba halo buska no aprensaun ba kontentór tolu iha Portu Tibar, tanba sei iha hela prosesu selu taxa. Maske nune’e, autoridade prende ona ninia dokumentu sira.
Ekipa husi MS ne’ebé akompaña prosesu ne’e hatete, aimoruk item 150 ne’ebé asegura iha armajen iha área Vila Verde iha autorizasaun, maibé fatin ne’ebé aluga hodi sai armajen ne’e laiha lisensa husi MS.
“Fatin ida agora daudauk ita mai ne’e, laiha koñesimentu, no laiha autorizasaun, laiha lisensa husi Gabinéte Lisenseamentu Ministériu Saúde. Autoridade Ministériu Saúde loos duni fó nia lisensa, mais, lisensa iha ne’e ba Moris Foun, Kolmera, ida ne’e ita la hatene, naran saida ita mós la hatene, tanba la rejistu,” katak nia.
Loloos, tuir nia, atu armajena sasán sira ne’e, presiza hetan lisensa husi autoridade MS.
“Baibain autorizasaun lisenseamentu ne’e Ministeriu Saúde tenke halo mak dahuluk iha meius kontrolu hodi garante efikánsia, seguransa ho produtus sira farmaseutika no medikamentu, nune’e labele fó ameasa ba saúde públika, ida ne’e mak ita halo,” fonte ne’e dehan.
Entretantu, tuir planu, iha 23 Fevereiru, ohin, jerente klinika Moris Foun na’in tolu ne’ebé detein iha 21 Fevereiru, sei aprezenta ba tribunal hodi halo interogatoriu judisial dahuluk.
