Tanba haree ba situasaun ne’ebé Timor-Leste enfrenta, enkuantu Governu aplika medidas ona atu hamenus Covid-19 hada’et ba beibeik, mosu fali  krime ho forma foun iha sosiedade, hanesan krime la kumpre lei no violénsia oioin, ne’ebé iha relasaun ho jéneru no akontese  mós iha uma laran.

“Luta hasoru krime no aplika lei mak objetivu organizasionál rua hosi polísia sira iha mundu tomak. Maibé, dezafiu sira-ne’ebé mosu ohinloron ho pandemia ida ne’e obriga polísia sira muda sira-nia atuasaun. Tanba ne’e  polísia sira iha mundu mós tenke foka liután ba sira-nia knaar nu’udar instituisaun ida ne’ebé dedika-an liuliu ba apoiu umanitáriu maibé la’o nafatin nu’udar instrumentu hasoru krime,”reafirma Presidente Repúblika Fransisco Guterres Lú Olo, iha nia mensajen nasionál, ba aniversariu PNTL ba dala-21.

PR Lú Olo dehan, liuhusi situasaun emerjénsia ida ne’e, Forsas no Servisus Seguransa, liuliu Polísia Nasionál Timor-Leste, tenke adapta ninia knaar ba situasaun foun ida ne’e.

Tanba ajente polísia la’ós sidadaun baibain maibé sidadaun kualifikadu ida no, nune’e, nia tenke tau matan ba orden públika, tenke iha konxiénsia katak ninia knaar sosiál importante tebes, hatene simu ho ulun malirin krítika saída de’it husi sidadadun sira, no sai ezemplu di’ak ba sosiedade nuudar sidadaun ne’ebé kumpre mós lei no regras no nune’e bele mós defende dignidade PNTL nian.

Bainhira fiskaliza kumprimentu medidas prevensaun husi Governu, tenke haktuir prinsípius Estadu Direitu nian iha kontestu emerjénsia nian, ho maneira ida ne’ebé hanorin, informa no orienta ita-nia povu, no  uza de’it  forsa bainhira presiza duni maibé  tuir situasaun ida-idak  ezije no natoon de’it hodi  kontrola kedas.

Haree ba knaar ne’ebé profisionál sira seguransa públika nian hala’o iha liña oin, importante tebes katak imi iha mós kondisaun servisu di’ak hodi hamenus risku infesaun. Ida-ne'e ezije halo mudansa ba imi-nia rotina servisu, tenke uza hodi biit ekipamentu protesaun pesoál, foti medidas seguransa no prepara materiál ba orientasaun.

Jornalista: Saturnina da Costa

Editor: Jose Sarito Amaral