Tanba ne’e, Xefe Estadu iha okaziaun Aniversáriu PNTL ba dala 21, sabdu horsehik (27/3), husu ba kontribuisaun ema tomak nian atu hamutuk hakaat liu susar ne’e, hamutuk hodi hapara pandemia Covid-19, tau aas intrese públiku no proteze nasaun nia distiñu.

“Luta ida-ne'e oin-seluk. Ita labele hasees ema ida no laiha ema ida bele hasees-an husi luta ne’e. Tempu to’o ona atu ita hothotu, no ita ida-idak, fó ita-nia kontribuisaun atu hamutuk hakaat liu susar ida-ne’e.  Ita tenke  hamutuk hodi hapara pandemia ida-ne’e no tau aas interese públiku no proteje Nasaun nia murak boot liu hotu–ita-nia ema– tau aas liu interese rasik no polítiku ne’ebé de’it,” Presidente Lú Olo hatoo mensajen nasionál ba aniversariu PNTL, liuhusi nia komunikadu imprensa.

Maluk sira ne’ebé iha responsabilidade aas iha sosiedade labele haluha no labele halo ema haluha risku ne’ebé asosia ho Covid-19.

Xefe Estadu ne’e husu sira ne’ebé responsabilidade aas iha sosiedade labele hasees-an no labele halo ema hases-an husi medida sira ne’ebé Governu foti atu prevene no hamenus vírus Covid-19 hada’et husi ema ba ema.

Iha situasaun krize ne’ebé grave, hanesan situasaun pandemia ne’ebé hasoru daudaun ne’e, tenke halo jestaun ida ne’ebé efikás no efisiente. Nune’e, presiza hatene saída mak atu halo, halo planeamentu, organizasaun, asaun no avaliasaun beibeik, no liuliu, tenke foti desizaun oioin ho lailais.

Maibé atu foti desizaun oioin ho lailais, presiza rekursus hothotu, umanus, ekipamentu no orsamentu iha tempu badak nia laran atu nune’e organizasaun no instituisaun sira bele atua kedas.

Jornalista: Saturnina da Costa

Editor: Jose Sarito Amaral