Presidente Repúblika Fransisco Guterres Lú Olo konfesa katak, iha tinan ida ne’e entre instituisaun públika ne’ebé hola parte iha luta hasoru surtu Covid-19, PNTL mós iha liña oin hodi tau matan ba ema hotu nia seguransa no saúde.

Tanba ne’e, Xefe Estadu hato’o nia hako’ak boot ba Instituisaun PNTL, ba feto no mane sira hotu ne'ebé loroloron dedika no sakrifika sira-nia an tomak atu garante seguransa no moris-di'ak ba Timoroan sira.

“Entre instituisaun públika sira-ne’ebé hola parte iha luta ida-ne’e, Polísia Nasionál Timor-Leste hamriik iha liña oin hodi tau matan ba ita hotu nia seguransa no saúde. Tanba ne’e, ha’u hakarak hato’o ha’u-nia hako’ak boot ba Instituisaun ida-ne’e, ba feto no mane sira hotu ne'ebé loroloron dedika no sakrifika sira-nia an tomak atu garante seguransa no moris-di'ak ba Timoroan sira,”PR Lú Olo hatoo nia mensajen ba aniversariu PNTL ba dala-21, sabdu horsehik (27/3).

Liuhusi loron aniversáriu PNTL nian, Xefe Estadu ne’e saúda PNTL liuhusi Komandante-Jeral Komisáriu Faustino da Costa no Segundu Komandante-Jeral Mateus Fernandes

Luta hasoru Covid-19 sai hanesan oportunidade di’ak ida atu tetu ita-nia reziliénsia nasional hasoru dezafiu boot liu iha Timor-Leste nia istória dezde ita restaura ita-nia  Independénsia iha 20 maiu 2002.   

Tinan ida ne’e (2021) PNTL la selebra nia aniversariu ba dala-21, tanba iha situasaun implementasaun serka sanitária no konfinamentu obrigatóriu relasiona ho surtu Covid-19.

Iha situasaun pandemia, PNTL mós iha liña oin hodi exekuta rezolusaun Governu nian, atu nunee ema hotu bele kumpri medidas sira iha situasaun pandemia Covid-19.  

Tuir observasaun online INDEPENDENTE iha terrenu katak atu asegura serka sanitária iha Dili, PNTL  transitu halo operasaun pasa revista, hafoin simu orientasaun servisu husi Komandu Jeral PNTL.

Jornalista: Saturnina da Costa

Editor: Jose Sarito Amaral