"Durante ne'e ita hakarak Sua Santidade Franscisco mai vizita Timor-Leste hodi kria pás no estabelidade ba sarani sira iha Timor-Leste hodi hametin fiar Katólika," dehan nia ba jornalista INDEPENDENTE iha Rotunda Nicolau Lobato, Segunda (09/09).
Entretantu tuir observasaun husi Jornalista INDEPENDENTE iha terenu nota katak, antes Sua Santidade Francisco to'o iha Rotunda Nicolau Lobato Sarani sira hakilar ho matan we'en hodi simu viva Papa Franscisco.
Nune'e mos sarani sira hiit bandeira Timor Leste ho Vatikano nia hodi hakilar viva Sua Santidade Francisco ne'ebé ohin loron vizita ona iha Timor-Leste.
Bainhira Sua Santidade Francisco to'o iha Rotunda Nicolau Lobato, sarani sira la sente klima nia manas, tanbá sira simu ho haksolok.
Sarani balun maske sente hamlaha no hamrok iha loron manas maibé nafatin hein ho aman espirituál Papa Francisco.
Hafoin Papa Francisco to'o iha Aeroportu Comoro, Papa ho nia delegasaun sei simu husi Xefe Estadu no Governu no bispu sira iha Timor-Leste, hafoin ne'e Papa sei ba deskansa iha Nunsiatura Apostolika iha Motael, Dili.
18:00 lorokraik, Papa Francisco ne'ebé hanesan Xefe Estadu Vatikanu nian ne'e sei ba iha Palásiu Prezidensiál Nicolau Lobato, Bairru Pite, hodi hala'o enkontru ho Prezidente Republika, José Ramos Horta. Iha oras hanesan, Primeiru-Ministru, Kay Rala Xanana Gusmão, sei hasoru malu ho ninia omologu Kardinal Pietro Parolin, ne'ebé sei la'o durante minutu 20 nia laran.
Iha Palasiu Prezidensiál Nicolau Lobato, iha tuku 19h00 kalan ne'e, Papa Francisco sei lee ninia diskursu ne'ebé partisipa husi Xefe Governu no membru Governu da-sia (IX), sosiedade sivil, korpu diplomátiku no konvidadu sira seluk hafoin fila hikas ba Nunsiatura Apostólika Motael.
Iha tersa (10 setembru 2024), iha tuku 08h45 dadeersan, Papa Francisco sei vizita labarik sira ema ho defisiensia (moras autis) ne'ebé hela iha orfonatu (ALMA) iha Pantai Kelapa, Dili.
Iha tuku 09h30, Papa Fransico sei halo sorumutu ho bispu, padre, madre, diaknu, seminarista no katekista sira iha igreja Imaculda Conceição Katedrál Vila Verde, Dili.
