Reprezentante Sarani Fatuhada, Filomena Freitas hatete, antuziasmu loos tanba prezensa Sua Santidade Papa halibur sarani Katólika iha teritóriu hodi mai simu bensaun.

"Ami kontente loos, tanba vizita São Pedro nia saseluk ne'e mai ba dalarua. Antuziasmu tebes tanba sua santidade ninia prezensa ne'e mai halibur sarani Katólika sira iha teritóriu tomak inklui mós relijiaun seluk hodi hein no hakarak simu bensaun husi Sua Santidade. Ami iha esperansa boot katak sua santidade ninia prezensa ne'e lori paz no damen mai ita-nia rai, liuliu ba ita-nia joven sira iha Timór nune'e mós ba sarani Katólika hotu, paz, harmonia ba ita ida-idak nia família, no mós ba nasaun Timor-Leste," nia dehan, iha Fatuhada (09/09).

Sarani Madalena de Jesus mós hatete, antuziasmu loos ho prezensa Sua Santidade Papa, tanba hakarak hetan bensaun.

"Ami sente kontente no orgullu tebes. Ami ohin dader kedas mai hamrik iha ne'e hein sua santidade ninia prezensa maibé ami la sente hamlaha no hamrook e nein atu kolen tanba ida ne'e São Pedro nia saseluk ne'ebé mak sei mai fo bensaun ba ita no ba ita-nia Timor-Leste," nia dehan.

Nia hatutan, ho esperansa vizita sua santidade Papa Francisco ne'e, Timoroan sira sei haksolok liután harmonia no hela ho paz.

"Ho esperansa katak prezensa sua santidade Papa mai ne'e, ita sei hetan paz, ksolok no harmonia liután. Ita-nia joven sira sei moris nu'udar maun alin no hakribit violénsia no lori Timor-Leste ba oin," nia hatutan.

Tuir observasaun jornalista iha terrenu, bainhira kareta Sua Santidade Papa Francisco nia halai tesik mai iha parte Fatuhada sarani sira hakilar, haklalak ho tanis hodi bolu sua santidade Papa nia naran.

Hafoin Papa Francisco to'o iha Aeroportu Comoro, Papa ho nia delegasaun sei simu husi Xefe Estadu no Governu no bispu sira iha Timor-Leste, hafoin ne'e Papa sei ba deskansa iha Nunsiatura Apostolika iha Motael, Dili.

18:00 lorokraik, Papa Francisco ne'ebé hanesan Xefe Estadu Vatikanu nian ne'e sei ba iha Palásiu Prezidensiál Nicolau Lobato, Bairru Pite, hodi hala'o enkontru ho Prezidente Republika, José Ramos Horta. Iha oras hanesan, Primeiru-Ministru, Kay Rala Xanana Gusmão, sei hasoru malu ho ninia omologu Kardinal Pietro Parolin, ne'ebé sei la'o durante minutu 20 nia laran.

Iha Palasiu Prezidensiál Nicolau Lobato, iha tuku 19h00 kalan ne'e, Papa Francisco sei lee ninia diskursu ne'ebé partisipa husi Xefe Governu no membru Governu da-sia (IX), sosiedade sivil, korpu diplomátiku no konvidadu sira seluk hafoin fila hikas ba Nunsiatura Apostólika Motael.

Iha tersa (10 setembru 2024), iha tuku 08h45 dadeersan, Papa Francisco sei vizita labarik sira ema ho defisiensia (moras autis) ne'ebé hela iha orfonatu (ALMA) iha Pantai Kelapa, Dili.

Iha tuku 09h30, Papa Fransico sei halo sorumutu ho bispu, padre, madre, diaknu, seminarista no katekista sira iha igreja Imaculda Conceição Katedrál Vila Verde, Dili.