Ema ho Defisiénsia, Gabriel de Oliveira de Araujo hatete, loron manas maibé sente hanesan malirin, tanba vizitasasun Amu Papa nian ne'e sai istória boot ba jerasaun sira.

“Nu'udar ema Katólika la kolen hodi hein tanba Santu Papa bele mai sama rai doben timor iha tempu ita nian ne'ebe sai istoria ida ba  ita, tanba uluk ne'e Apa sira konta ita rona de'it, maibé agora ne'e ita haree direta rasik, maske loron manas mais ami sente malirin hela,”  Dehan nia ba jornalista INDEPENDENTE iha Fatuhada

Mesmu kondisaun defisiensia, nia mós lakohi atu asiste iha Televizaun, maibé hakarak haree direitamente asiste hodi hein iha dalan para bele haree Amu Papa nia oin.

Nia dehan, nu'udar sarani timoroan ne'ebé hela iha rai Timor mak Amu Papa vizita tenke asiste direita labele asiste iha média tanba ida ne'e istória foun ba jerasaun sira hodi konta.

“Ha'u orgullu tebes, tanba baibain kan la’os hansa ne'e mais ohin ne'e mesak labarik, ferik no katuas sira la baruk maske loron manas mós ita kontente loos,” Nia espresa.

Bainhira Papa Francisco liu, nia informa, Amu Papa liu husi hasa’e liman signifika Maromak tun mai hodi haraik bensa ba sira ona.