Sekretariu Estadu Ensinu Sekundariu Jerál no Ensinu Sekundariu Tékniku Vokasional, Domingos Lemos Lopes hatete, Universidade Muria Kudus Indonézia sei oferese bolsu estudu ba jovem timoroan sira iha tinan ne’e (2024).
“tanba ida ne’e mak ohin lokraik ida ne’e ami la diskuti barak maibé mai ko’alia oituan deit hodi esklarese ba malu kona-ba ba situasaun sira ne’e hotu, no iha tempu badak mos Sekretáriu Estadu Ensinu Sekundáriu no Tékniku Vokasionál sei asina memorandum ida ho universidade Muria Kudus Indonezia kona-ba bolsu estudu ne’ebé mak sira oferese mai estudante timoroan sira,” dehan Govenante ba Jornalista Hafoin hala’o enkontru ho ME iha Salaun VIP-ME Vila-Verde, Kuarta (05/06).
Kona-ba memorandu, Serkretariu Estadu dehan, asuntu ne’e parte legal husi Ministériu Edukasaun (ME) ho Universidade Muria Kudus sei haree kona-ba saida mak tau iha akordu ne’e rasik atu nune’e prosesu ba futuru labele mosu dezentendimentu entre Timor ho Indonezia iha koopersaun ne’e.
Reitór Universidade Muria Kudus Indonézia, Darson hatete, sira-nia parte hasoru Ministériu Edukasaun (ME) atu oferese bolsu estudu ba estudante sira ba iha nível lisensiatura, tanba sira Universidade Muria Kudus Indonézia hahú ona hasa’e estudante la’os rekruta de’it estudante iha rai-laran maibé husi mós rai-li’ur liliu Nasaun viziñu sira hanesan Timor-Leste.
“Ami ba ona Thailand no ami ba Timor-leste signifika ami sei fó liu prioridade ba ami-nia nasaun vizinu espesial Timor-Leste ne’ebé iha istória pasadu kona-ba independensia no seluk tan,” katak Reitór
Reitór ne’e hatutan, prezensa sira nia TL atu oferese bolsu estudu ba kandidatu timoroan na’in lima (5) ne’ebé universidade mak sei apoiu finaseiru tomak hanesan eskola, hahan no hela fatin.
Reitór ne’e esplika, universidade Muria Kudus hahú eskola iha fulan-Setembro Tinan ne’e, ho nune’e bolsu estudu ne’ebé sira oferese dahuluk ne’e ba estudante sira ne’ebé mak remata ona ensinu sekundariu ita tinan kotuk.
Bolsu estudu ne’e nia durasaun tinan haat (5), no universidade ne’e rasik iha fakuldade neen hanesan, Fakuldade Edukasaun, Agrikultura, Enjeñaria, Direitu, Psikolojia No Ekonomia.
Enkuantu, area ne’ebé atu oferese ba timoroan sira sei iha prosesu diskusaun.
