Koordenadór Gabinete Apoia Sosiedade Sivil, Joaquim Freitas hatete, hafoin lansa programa ema hotu ba edukasaun, “kualidade no relevánsia ensinu sekundária tékniku vokasionál iha Timor-Leste.
“TLCE hetan aprovasaun $25 mill ne’ebé mak sira tau prioridade liu atu halo monotorizasaun kualidade ensinu sira iha Timor laran, iha primeira faze ne’e ita sei deside lai montante ne’ebé mak rozoável hodi sira implementa, sé sira implementa di’ak tinan oin ita bele hasa’e montante orsamentu ne’ebé iha se laiha tinan oin ita la presiza ona,” dehan Koordenadór ba Jornalista sira iha studio III Televizaun Indepedente Hudi-Laran, Tersa (04/06).
Kona-ba apoiu orsamnetu ne’e nia dehan, apoiu GASC nian ba TLCE la’ós fasil maibé liu husi prosesu ne’ebé naruk.
“TLCE atu sai parseiru ne’e naruk, la’os toba hader mai TLCE sai parseiru, TLCE liu halo proposta ami iha obrigasaun tenki lee hotu proposta sira ne’e, terseiru ami tenki lori proposta ne’e ba ekipa selesaun proposta enkuantu halo desizaun, ami tenki halo ezersísiu tomak, para organizasaun 300 ne’ebé mak submete proposta ne’e maioria bele sai parseiru, iha proposta laran ami tenki hatene sira iha serteza atu implemeta programa sira ne’e oinsa no ikus liu ami deside katak sira bele sai parseiru,” katak koordenadór.
Diretór Ezekutivu Timor-Leste Coalition For Education, Jose Monteiro hatete, durante monitorizasaun ne’e la’o, TLCE identifika eskola téknika vokasional seida’uk iha kapasidade kompetisaun, tanba iha dezafiu espesífiku sira hanesan disponibilidade infrastrutura no kualidade profesor sira.
“Tékniku vokasionál seidauk iha kapasidade kompetisaun ne’e jeral, iha dezefiu espesifiku sira hanesan disponibilidade infrastrutura kualidade profesores tanba iha polítika kuríkulum téknika vokasionál ne’e tenki iha profesores ne’e tenki iha sertifikasaun profisionál nível hitu (7), depis nia mak bele hanorin estudante sira, depois sira mós remata sira hetan sertifikasaun nível três husi INDMO no Ministériu Edukasaun (ME) fó diploma hanesan babain,” nia esplika.
Relasiona ho difikuldade eskola tékniku vokasionál nian ne’e, nia dehan, mak TLCE liu husi apoiu GASC realiza programa “ema hotu ba edukasaun”, atu fó oportunidade ba parseiru sira no komunidade edukativa, atu partilla sira nia ideia no matenek.
GASC mós fó livremente ba TLCE atu halo apresiasaun ba organizasaun sira seluk hodi hetan apoiu, tanba iha ona ONG nasional no internasional barak iha Timor-Leste.
