Tuir Ministru Prezidensia Konsellu Ministru Fidelis Leite Magalhães hatete,  Konsellu Ministru aprova mós projetu rezolusaun Governu nian ba renovasaun impozisaun serka sanitária no konfinamentu domisiliáriu jerál ba populasaun iha munisípiu Baukau no Vikeke to’o tuku 23:59 loron 2 fulan-abril tinan 2021.

“Mantein nafatin regra sira hotu ne’ebé antes ne’e defini ona iha Rezolusaun Governu nu. 17/2021, 18/2021, 19/2021 no 20/2021 loron 15 fulan-marsu, ne’ebé impoin serka sanitária no konfinamentu domisiliáriu iha munisípiu Baukau no Vikeke,”dehan nia iha konferensia imprensa iha Palasiu Governu (29/03).

Nune’e, kontinua bandu sirkulasaun ema entre munisípiu rua ne’e ho sirkunskrisaun administrativa sira-seluk, exetu iha kazu sira ho fundamentu forte tanba razaun seguransa públika, saúde públika, asisténsia umanitária, manutensaun husi sistema abastesimentu públiku ka ba realizasaun interese públiku nian.

Permanese nafatin mós impozisaun no konfinamentu domisiliáriu ba ema hotu ne’ebé hela no daudaun ne’e iha munisípiu Baukau no Vikeke, exetu ba razaun ne’ebé maka antes ne’e defini ona, liuliu ba razaun saúde, servisu, no ba asesu ba sasan no servisu primeira nesesidade nian.

Antes ne’e Konsellu Ministru aprova ona rezulusaun governu nian numeru 16/2021 ne’ebé impoin serka sanitaria ka konfinamentu obrigatoriu iha munispiu Baucau no Vikeke hahú iha loron 15 fulan marsu to’o loron 29 fulan marsu tinan 2021.

Nune’e ohin KM deside renova tan serka sanitária iha munsipiu rua ne’e to’o loron 2 fulan Abril tinan 2021.

Jornalista: Saturnina da Costa

Editor: Jose Sarito Amaral