Kordenador Forsa Tarefas no Mitigasaun surtu Covid-19 iha Timor-Leste, Rui Maria de Arauju hatete, Ohin, iha Munisipiu Dili iha kazu foun 21.
“Husi kazu foun nain 21 ohin, iha mane na’in 13 no feto na’in 8. Sira ne’ebé sintomátiku hamutuk na’in 5 no Asintomátiku ka lahatudu sintomas hamutuk na’in 16,”dehan nia liu husi telekonferensia iha CCD,(29/03)
Nune’e, kazu detetadu ka pozitivu iha Munisipiu Dili husi loron 7 fulan-marsu 2021, to’o ohin, loron 29 fulan-marsu tinan 2021, hamutuk 350.
Ho nune’e, iha Munisipiu Dili, sei iha cluster 45 mak sei nafatin hatudu atividade hada’et tutan virus SARS-CoV-2 husi ema ida ba ema seluk, liu-liu iha Suku Bebobuk, Fatuhada ho Comoro.
Entretantu, dadus jeral ba loron ohin iha kazu foun na’in 21, kazu rekuperadu na’in 1 no kazu ativu hamutuk na’in 342.
Husi horiseik mai ohin teste Laboratorium Nasional Saúde halo teste PCR hamutuk na’in 565, inklui ona iha laran na’in 241 ne’ebé mai husu pedidu autorizasaun esepsionál atu sai husi serka sanitária iha Munisipiu Dil
Total pedidu autorizasaun esepsionál atu sai husi no tama mai serka sanitaria iha Munisipiu Dili, horiseik loron 28 fulan-marsu, hamutuk hotu na’in 43. Sekretariadu SIJK responde hotu kedas, maibé na’in 7 nia pedidus mak la prienxe kriteriu tuir Resolusaun Governu.
SIJK nafatin apela ba komunidade iha fatin ne’ebé maluk sira rekuperadu sira hela bá, favor labele tauk, tamba sira ne’ebé sai husi fatin izolamentu, ekipa saúde sira sertifika ona katak sira la iha ona risku atu hada’et-tutan virus ba ema seluk.
Apela ba populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona, uza mascara, Fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, hamriik ka tur dook husi ema seluk, mínimu metru ida ho balun.
Jornalista: Saturnina da Costa
Editor: Jose Sarito Amaral
