Nia dehan, razaun halo diskriminasaun primeiru, estudante barak seidauk selu, maibé orientasaun hahú ona, tuir matadalan hatete katak orientasaun akadémiku ne’e direitu ida husi estudante foun, estudante foun sira ne’e tama ho data hanesan, oras hanesan ho naran públika iha pajina ofisial iha ensinu superior nian, maibé reitor obriga estudante balun tuir ona orientasaun.
“Ho ida ne’e ami lamenta tebes, tanba ne’e mak ami nia ejizensia mak ne’e hakarak ka lakohi estudante sira selu hotu mak foin tuir orientasaun akademiku, atu nune’e trata estudante sira hotu ho dignu, trata ema hotu iha dalan ne’ebe los, la’os ida ne’e de’it mak ami hato’o maibé antes ne’e ami halo ona kompetisaun ba reitor maibé lakohi fó resposta, tanba ne’e mak ami deside blokeia orientasaun akademika ida nee,”dehan nia iha Kampu Sentral UNTL, segunda (13/03).
Nia hatutan, magnifiku reitor, vise reitores no estrutura sira laiha jestaun di’ak atu kria mekanizmu halo atendimentu ba estudante sira iha BNCTL ne’ebe lokaliza iha UNTL sentral no mós administrasaun akademika nian.
Tuir nian, estudante balun forma iha Banku atu selu sena malu, dudu malu, balun dezmaia no balun osan lakon maibé estrutura UNTL nunka mais foti asaun ida atu bele rezolve problema sira ne’e.
“Ami lakoi tan iha loron tuir mai estudante kontinua sena malu no dudu malu, se estudante sena malu nafatin dudu malu nafatin iha administrasaun akademika nian mak ami sei konsidera katak, katak reitor ho estrutura sira laiha ona kapasidade atu rezolve problema sira ne’e, ida ne’e mak ami nia pozisaun husu ba magnifiku reitor atu koalia ho estudante mak bele iha solusaun,” dehan nia.
Iha fatin hanesan, Magnifiku Reitór Universidade Nasional Timor Lorosa’e (UNTL), João Soares Martins informa, Tuir lolos estudante foun tinan akadémiku 2023 hahú aula ona, maibé prosesu selesaun tarde, tanba ne'e husu ba senadu sira hodi bele komprende no bele tetu.
“Ohin ne'e, ita halo abertura ne'ebé ita tenke respeita malu, estudante sira tarde ona, lolos sira hahú aula iha fulan fevereiru, maibé prosesu selesaun tarde entaun labele hahú, ha'u husu ba senadu sira bele komprende, ita bo’ot sira nia ejizensia sira ami bele simu, ami bele tetu, ita nia abertura ita tenke hahú ohin, formalmente loke abertura fakuldade atu extende la problema, ida ne'e mak reitor nia opiniaun,” dehan nia.
