Diretor Ezekutivu Konsellu Imprensa, Rigoberto Monteiro hateten, prinsipiu Konsellu Emprensa simu ona karta ida husi STAE atu kontinua organiza akreditasaun jornalista bainhira atu halo kobertura ba eleisaun no kampaña.

"Ita sei servisu hamutuk ho STAE no CNE iha prosesu ida-ne'e to'o hotu," dehan nia, iha Salaun Delta Nova, Komoro, Sesta (10/3).

Iha fatin, Reprezentante KI, Expedito Dias Ximenes hatete, Konsellu Emprensa sei nafatin ho STAE atu mobilizasaun jornalista sira iha fatin ne'ebé sira halo servisu bele vota iha ne'ebá de'it.

"Atu jornalista sira nafatin kobertura iha munisípiu karik ho kredensial ne'ebé STAE fó ita sei halo votasaun iha fatin ne'ebé de'it ita halo kobertura tantu ida-ne'e ita sei kontinua," dehan nia.

Nia dehan, oras ne'e daudaun STAE haruka ona karta atu Konsellu Imprensa atu haruka naran jornalista sira ne'ebé sei kobertura durante eleisaun no kontazen votus.

"Ami husu mós média sira atu hato'o naran kolega jornalista, atu ami mós hatoo fali ba STAE," nia husu.