Diretór Servisu Edukasaun Munisipiu Díli, Sabino da Costa Pereira hatete, tuir dadus provizóriu dadus hamutuk iha atus lima resin, nune’e ekipa sira nafatin kontinua buka dadus sira.
“Rejistu ona estudante hamutuk atus lima resin, maibé dadus ne’e seidauk klaru tanba dadaun ne’e ekipa kontinua halo hela leventamentu dadus,” dehan Diretór ba Jornalista Indepedente iha nia knaar fatin Komoro, Segunda (03/06).
Kona-ba dadus provizóriu ne’e, nia esplika, Ministériu Edukasaun (ME) rejistu ne’e kompostu husi estudante pre-primária to’o universidade.
Dadaun ne’e Ministeriu Edukasaun (ME) fó ona orientasaun ba Servisu Edukasaun Munisípiu Dili hodi prepara formatu atu nune’e bainhira estudante sira atu halo transferensia karik bele fasilita sira.
Entre dadus provizóriu atus lima ne’e, nia esplika, estudante ida husi Ensinu Báziku Sentral 30 Agusto mak foti ona karta transferensia SEMD. Tan ne’e nia parte nafatin hein banhira inan-aman sira atu ba trata oan sira-nia karta tranferensia sira prontu atu fasilita.
Estudante Universidade ne’ebé afeita ba despeza administrative ne’e, kompeténsia Ministériu Ensinu Superiór Siénsia no Kultura (MESSK) mak sei atende kona-ba estudante sira-nia problema.
Despezu administrativu ne’e, SEATOU hala’o ona iha fatin-fatin maibé nia parte seidauk simu informasaun husi inan-aman ka pesoál sira ne’ebé hanorin hela kona-ba estudante sira ne’ebé mak atu halo transferensia ba eskola seluk.
Nia hatutan tan katak, to’o agora sira nia parte mós seidauk simu reklamasaum ho ida ne’e signifika katak estudante sira la’o di’ak hotu.