Prezidente IKS-PTL, Silvetre Xavier Sufa alerta ba membru IKS-PTL tomak ne'ebé namkari iha Timor Leste atu hakmatek hodi kontribui ba pas no dame durante natál no tinan foun.
"Husu membru hotu-hotu bele hadook an husi violénsia, labele hemu lanu hodi provoka problema ikus mai fó impaktu ba organizasaun. Ha'u hakarak hatete ba membru hotu-hotu atu respeita loron bo'ot ida ne'e, tanba ita maiória Katólika," dehan Silvetre Xavier Sufa ba jornalista jornál INDEPENDENTE hafoin partisipa diálogu mak dalan unidade hodi garante prosesu dezenvolvimentu nasionál ne'ebé dirije husi Prezidente Repúblika, José Ramos Horta iha salaun Palasiu Prezidénsia Bairu-Pite, (20/12).
Nia hatete, membru IKS sira tenke hakruk no respeitu selebrasaun ida ne'e, nune'e ema hotu-hotu kontente no haksolok hodi simu Jesus.
Reprezentate 77, Teotodio Macedo husu ba arte rituais, liu-liu 77 iha Timor laran tomak atu hotu hotu hakmatek, kria pas no estabilidade hodi selebra natal no tinan foun ho familia sira.
"Ha'u nia mensajen ba arte rituais 77 iha Timor laran tomak, loron bo'ot natál no tinan foun ita hotu- hakmatek, kria estabilidade, labele halo provokasaun entre arte marsiais no arte rituais hodi kria problema, tanba nasaun ne'e presiza joventude kria estabilidade no paz,” nia deklara.
Entretantu, Sekretáriu Jerál KORK Edmundo Caetano husu organizasaun arte marsiais KORK iha loron espesiál tinan ida ne'e, tinan ikus natál membru KORK hotu-hotu tantu iha rai laran no mós rai li'ur hotu-hotu tenke kria paz no estabilidade ba rai ida ne'e, ba inan aman sira asegura ba sira nia vida ba Igreja tuir ida-idak nia fiar.
"Ami KORK prontu atu kontribui paz no estabilidade iha rai laran, karik iha loron bo'ot mak akontese ita tenke halo identifikasaun nia problema ne'e saida, mai husi ne'ebé, mai organizasaun ka mai husi partikulár tenke investiga foin hatene nune'e ita bele fó sansaun ruma tuir ita nia rejimentu internu ninian. Ha'u hanoin klaru katak membru KORK hotu-hotu tenke sempre kumpri orientasaun ne'ebé mai husi estrutura tomak nune'e sira bele kria paz no estabilidade iha rai laran," tenik nia.
