Ministru Petroleu Rekursu Minarais (MPRM), Francisco da Costa Monteiro hatete, dezentendimentu entre kompaña Timor Resource ho Timor GAP akontese kedas kedan iha Governu anterior no agora iha prosesu atu rezolve.
" Iha oituan dezentendimentu entre Timor Resource ho Timor GAP no agora iha prosesu nia laran atu buka dalan hodi solusiona," dehan Francisco da Costa Monteiro ba Jornalista INDEPENDENTE iha Parlamentu Nasional, (20/12).
Molok ne'e, Manager Country Timor Resource, Filomeno de Andrade hatete, atividade perfurasaun mina matan iha suai paradu, tanba sei hein parte rua kompaña ho Timor GAP ho ANP.Ip resolve lai problema ne’ebé iha hafoin bele kontinua.
"Ami halo ona konfirmasaun ho Timor GAP atu tuur hamutuk hodi hakat ba oin, tanba durante ne'e interpretasaun kontratu ba halo operasaun nian mak problema, entaun ami para provizoriu halo perfurasaun,"dehan nia ba Jornalista sira iha salaun Delta Nova, fulan hirak liu ba.
Kompaña Timor Resource mós ko’alia ona ho MPRM ho Prezidente ANP foun no Timor GAP atu rezolve problema ida ne'e.
" Atividade para temporariu de'it hodi hein desizaun, maibé semana oin kuandu ami tu’ur hamutuk depois mak fó solusaun," tenik nia.
Timor Resource investe ona osan hamutuk millaun $70, tanba ne’e kompaña kontinua hala’o servisu ba perfurasaun posu mina matan tolu iha Suai.
