Xefe Departamentu Emerjensia, HNGV, Eldegar Lopes Martins informa, iha fulan Outubru pasiente na’in 15 mak lakon vida, no iha fulan Novembru iha na’in 14.
“(Pasiente) balun grave loos konsege mai to’o iha emerjensia maibé la to’o oras tolu ka haat sira mate ona, tanba ne’e iha fulan rua nia laran hahu husi fulan Outobru no Novembru ita-nia pasiente sira ne’ebé mak mai iha emerjensia mak mate hamutuk 29,” informa Eldegar iha sala emerjensia HNGV, Kuarta (20/12).
Aleinde na’in 29 ne’ebé mate iha sala emerjensia, nia dehan, iha mós na’in 29 seluk ne’ebé lakon vida molok to’o iha ospital.
Iha fulan Outubru, nia dehan, na’in 18 mak mate molok to’o ospital, no iha fulan Novembru iha na’in 11.
“Pasiente sira ne’ebé mak mate iha uma ka iha dalan tanba kondisaun grave ona no sira la konge kuidadu iha ne’ebá, entaun mai mate tiha iha dalan mak foin lori mai iha emerjensia,” dehan nia.
Ho ida ne’e, nia husu ba familia sira bainhira iha membru familia mak hetan moras derrepente tenke halo lalais primeiru sokoru, tanba daudaun ema barak mak monu iha uma mak lori mai emerjensia no dala-ruma to’o iha emerjensia labele salva ona.
“Ita mos hakarak husu ba iha ita-nia governu sira atu aprova lei Bom Samaritano tenke iha, atu nune’e bele proteze ema hotu ne’ebé mak iha hanoin di’ak hodi ajuda ema sira ne’ebé mak monu ba tentasaun, tanba ita haree situasaun iha fulan rua ikus ne’e akontese ona kazu rua, ida joga manu-futun derepente hetan atakasaun fuan, maibe laiha ema ida mak atu ajuda, no ida monu iha Timor Plaza maibé ema hotu nonton de’it,” dehan nia.
Tanba ne’e tuir nia, tempu to’o ona atu hamutuk ho governu hodi ko’alia kona-ba lei Bom Samaritano, atu autoriza professional sira hodi bele treinu ema hotu hodi ajuda nia an rasik, familia no ema seluk.
Rejista Pasiente na’in rihun 10 resin
Iha fulan Outubru no Novembru tinan ne’e, Hospital Nasional Guido Valadares rejista pasiente na’in 10.645.
Xefe Departamentu Emerjensia, Eldegar Lopes Martins informa, iha fulan Outubru pasiente sira ne'ebé baixa iha maternidade na’in 874, interna na’in 362, sirurjia na’in 130, pediatria na’in 128, no pernatolojia na’in 128.
Iha fulan Novembru, sira ne’ebé baixa iha maternidade na’in 600, interna na’in 326, sirurgia na’in 119, pediatria na’in 111, na’in pernatolojia 62, no Psiquiatria na’in 4.
“Ita rejista pasiente hamutuk 10.645, kompostu husi fulan Outobru hamutuk 5.402 no Novembru 5.243,” informa Eldegar.
Aleinde ne’e, Eldegar informa mós kona-ba númeru pasiente ne’ebé baixa lalais iha sala emerjensia no sira ne’ebé konsulta de’it.
Iha fulan Outubru, iha na’in 1.855 mak halo tratamentu no alta kedas, no na’in 2.908 mak mai konsulta iha sala emerjensia.
Iha fulan Novembru, na’in 1.942 mak halo tratamentu no alta kedas, no na’in 3.144 mak mai konsulta.
