Pedidu fiskalizasaun abstrata husi bankada Fretilin ne’e mosu hafoin Prezidente Repúblika, José Ramos Horta, promulga Lei Indultu iha 12 Dezembru no iha 14 Dezembru ne’e oferese indultu ba eis Ministra Finansas, Emilia Pires, no eis Vise Ministra Saude, Madalena Hanjam, ne’ebé sai kondenada ba kazu korrupsaun.

Tuir informasaun ne’ebé Jornalista INDEPENDENTE asesu husi media bankada Fretilin katak, bankada Fretilin prepara ona pedidu fiskalizasaun abstrata ba Lei Indultu nian no iha 20 Dezembru, ohin, sei aprezenta ba TR.

 “Nafatin fó hatene ba kolega sira, aban (ohin) às 09:30 bankada Fretilin sei hodi pedidu fiskalizasaun abstrata ba Lei Indultu ne’e ba iha Tribunal Rekursu,” informa media bankada Fretilin liu husi mensajen ne’ebé Jornal INDEPENDENTE simu, Tersa (19/12).

Tuir planu, iha tuku 8 dader, sei iha enkontru iha Bankada Fretilin hodi deside see mak sei reprezentante Bankada Fretilin atu lori pedidu fiskalizasaun abstrata ba TR.

Tuir media bankada Fretilin, pedidu fiskalizasaun ne’e hetan mós apoiu husi deputadu bankada Partidu Libertasaun Popular.

“Pedidu fiskalizasaun abstrata ba Tribunal ne'e lá'os Bankada Fretilin de'it, maibé Bankada PLP hotu. Deputadu husi Bankada PLP na'in 4 asina ona pedidu fiskalizasaun abstrata ne'e,” informa media bankada Fretilin.

Molok ne’e, Deputadu Bankada Fretilin, Joaquim dos Santos informa katak, bankada Fretilin sei hato’o pedidu fiskalizasaun abstrata ba Lei Indultu ba TR.

"Ami sei lori ba tribunal, la kleur tan ami sei lori ba, ami sei prepara argumentu sira ba fiskalizasaun abstrata," dehan deputadu ne'e iha PN, Segunda (18/12).

Tuir nia, loloos bainhira sidadaun ida atu hetan indultu tenke tama lai faze dezisaun tribunal no estatutu tranzitu em julgamentu, tenke kumpre uluk pena.

“Kuandu la kumpre pena tuir Konstituisaun labele fó indultu,” dehan nia.