Despaisu husi Kaza Sivil Prezidensia Repúblika nú.706/GCCC/XII/2023, ne’ebé asina husi Xefe Kaza Sivil Prezidensia Repúblika, Jesuina Maria Fereira Gomes, informa kona-ba PR Horta ne’ebé promulga ona gaji 13 ba administrasaun públika, no pensaun adisional (pensaun 13) ba eis titular no eis membru orgaun soberanu sira.

Iha despaisu ne’ebé dirije ba parte governu ne’e hatete:

Promulgasaun Dekretu Lei: Aprova pagamentu extraordináriu salariu adisional fulan ida nian ba Administrasaun Publika no pensaun adisional ba eis titular no eis membru orgaun soberania, no suplementu remuneratóriu relasiona ho prosesu preparasaun Orsamentu Jeral Estadu 2024 no ezesiriu orsamental 2023.

Gabinete Xefe Kaza Sivil Prezidensia Repúblika aprezenta melor komprimentu ba Exelensia no hetan onra hodi enkamiña diploma ne’ebé asina husi Prezidente Republika iha 15 dezembru 2023, kona-ba Promulgasaun Dekretu Lei: Aprova pagamentu extraordináriu salariu adisional fulan ida nian ba Administrasaun Públika no pensaun adisional ba eis titular no eis membru orgaun soberanu, no suplementu remuneratóriu relasiona ho prosesu preparasaun Orsamentu Jeral Estadu 2024 no ezesiriu orsamental 2023.

Ba kestaun ne’e, Diretór Ezekutivu Forum Organizasaun Naun Governamental Timor-Leste (FONGTIL), Valentim da Costa Pinto hatete, eis titular no eis membru orgaun soberanu ne’e la servisu ona no kada fulan simu ona sira-nia subsidiu, tan ne’e loloos la presiza atu atribui tan gaji 13 ba sira.

"Ami-nia hanoin katak invez haree buat kona-ba populasaun sira no mós funsionáriu kiik-oan sira duke promulga osan ba eis titulár sira ne'ebé la halo kna'ar mais kontinua hetan sira-nia direitu, inklui hetan tan saláriu desimu 13 ne'e.”

“Invez fó ba ema kbi'it la'ek sira. Nusa ita la apoiu ba populasaun kbi'it la'ek sira ne'ebé bele kontente uitoan iha Natál no Tinan Foun ne'e, inklui mós funsionáriu ne'ebé saláriu kiik-oan ne'e. Apoiu ba eis titulár ne'ebé loloos ne'e kondisaun di'ak hela,” dehan nia via telefone Tersa, (19/12).

Iha fatin ketak, Peskizadór Asia Justice and Rights (AJAR), Inocencio de Jesus Xavier konsidera gaji 13 ne’e hamosu esbanzamentu Orsamentu Jerál Estadu nian ne'ebé tuir loloos tenke tau ba prióridade sira ne'ebé iha.

“Saláriu desimu 13 ne'e ita foti husi ne'ebé? Durante ne'e gavasola an, gasta osan de'it mais reseita loron ba loron tuun, fundu Bayu Undan ne'e agora hahú laiha ona operasaun ekonómika, estadu ne'e hanoin to'o iha ne'e ka la'e? ka estadu ne'e dura de'it ba mandatu tinan lima?,” dehan nia.

Timor-Leste, nia dehan, laos de’it ba Timor-oan ne’ebé daudaun ne’e moris hela, maibé sura mós ho jerasaun sira tuir mai.

“Estadu iha obrigasaun atu uza sasán sira ne'e ho responsablidade, labele hotu, rai todan ba ita-nia jerasaun tuir mai. Lei ne'e la nesesáriu, realidade ne'e se ita haree buat ne'e ho fuan, la'ós kanten, ne'e labele, nasaun ida ne'e dependesia ba mina ne'ebé tinan lima hotu ona, ita ba buka osan husi ne'ebé?" nia kestiona.

Ba kestaun ne’e, Prezidente Repúblika, José Ramos Horta hatete, saláriu desimu 13 ne’e atu ajuda sira-nia família la'ós atu lori ba pasiár iha Bali.

"Ha'u la hatene se eis titulár iha direitu ba saláriu desimu 13 mais, uluk ha'u-nia 13 mes ne'e ha'u fahe, ha'u nunka gasta desimu 13, ha'u fó ba orfaun sira, ba madre sira hodi tau-matan ba oan-kiak sira.”

“Ba eis titulár no membru governu se desizaun hatene lalika simu, ba ha'u di'ak mais ne'e lá'os hanesan atu poupa osan, tanba membru governu no eis titulár uitoan de'it, iha fatin mak bele poupa osan tanba gasta oan boot liu hanesan ba kombustivel karreta, ba AC, ne'e mak ita presiza haree atu poupa,” dehan Xefe Estadu ne’e.