Padre Tomas da Crus hatete, iha selebrasaun loron matebian nian tinan ida ne’e, lahanesan ho tinan kotuk (2020), tanba iha tinan ida ne’e, lori tristeza boot ba sarani Dioseze Baukau.
“Ita selebra loron matebian tinan ida ne’e, ho Amo Bispo Dom Basílio nia isin ne’ebé prezente dadaun iha ita hotu nia leet, ita tristi, ita tanis, ita hanoin tansa buat ne’e akontese iha momentu ida hanesan ne’e. Ita lasente, maibé ita nia moris iha nai Maromak nia planu, ita ema nia planu oin-seluk no Maromak nia planu ita la hatene,”dehan nia iha homilia ba selebrasaun loron matebian nian, iha Igreja Katedral Santo Antonio Baukau, tersa ne’e (02/11).
Tuir Amo Tomas, selebrasaun loron matebian tinan ida ne’e, konvida sarani sira atu haree ba ida-idak nia-an no moris hodi reza hamutuk.
Entretantu, sarani Dioseze Baukau, Ernesto Amaral Belo, espresa nia sentiment, tanba tinan ida ne’e sarani hotu lakon ona bibi atan diak ida iha Dioseze Baukau.
Tuir Ernesto, Saudozu Dom Basílio durante sei moris, sempre besik ba sarani sira ne’ebé dook husi igreja.
"ita haree ba tinan kotuk ita sente kontente, maibé tinan ida agora ba oin ita sente tristi ba Dioseze Baukau tomak, iha Manatutu, Vikeke, Lautem no Baukau ne’e, ita haree ba tristi tanba ita lakon moral, disiplina, ita lakon mós vida relijiozo, bainhira mak Maromak bele hili fali bibi atan diak hanesan ne’e, ne’e so tempu,”dehan nia.
Biografia Badak husi Dom Basilio do Nascimento.
Dom Basilio do Nascimento Moris iha Postu Administrativu Suai, iha loron 14 fulan-Juñu tinan 1950. Oan husi Victor do Nascimrnto no Terresa Mesquita.
Iha loron 26 Juñu tinan 1977, Basílio do Nascimento simu ordenasaun Saserdotal husi ArseBispu Dom David de Sousa iha Katedral Évora, Portugal. Tanba Indonezia halo Invazaun mai Timor-Leste Padre Basílio do Nascimento labele fila mai Timor-Leste, nune’e nia hala’o servisu asistensia religioja iha parokia Saint Jacque Haute ba imigrantes sira ne’ebé koalia lian portuges, no Español iha Paris, Fransa no Nia hela iha Paris to’o tinan 1982.
Iha loron 30 Novembru 1996, Papa São João Paulo II liuhusi Bula QUO APTIUS KONSULERETUR hodi hari Dioseze Baukau no simultaneamente nomeia Dom Basilio do Nascimentu nudar Administrador Apostoliku Dioseze Baukau.
Nune’e iha loron 6 Janeiru 1997 iha Basilica São Pedro, mak Papa, São João Paulo II ordena Dom Basilio do Nascimento nudar Bispo Titular de Septimunisia atu bele exerse nia funsaun nudar administrador apostoliku ba Dioseze Baukau hafoin hetan pose iha Dioseze Baukau iha loron 19 Marsu 1997, iha festa São José nian, akompaña husi nunsiu apostoliku iha Jakarta, Monseñor Pieto Sambi.
Nudar Bispu Dioseze Baukau, Dom Basilio do Nascimento hela iha Paso episkopal dioseze Baukau, kaza Episkopal Baukau, Avenida José da Costa Amâncio "Mauhudu" Baukau.
Asistente Editor: Saturnina da Costa
