“Kondekorasaun ho Kolar Ordem Timor-Leste, títulu póstumu ba Dom Basílio do Nascimento nudar rekoñesimentu husi Estadu ba ninia serbisu nunka kolen ba afirmasaun identidade Timoroan liu husi hasa’e valores no prinsípius moris Katóliku iha Timor-Leste,”liu husi mensajen ne’ebé Online INDEPENDENTE asesu, segunda ne’e (01/11).

Nune’e, Estadu rekoñese kontribuisaun Dom Basílio nian, iha luta ba auto-determinasaun Povu Timor-Leste.

Xefe Estadu afirma, Saudozu ne’e kontribui ba luta libertasaun nasionál liuhusi enkontrus sekretaris ho lider Frente Armada.

Dom Basílio do Nascimento lidera Igreja iha tempu okupasaun Indonézia nian, laós buat fásil ho konflitu oioin entre Katólikus sira.

 Nunee mós la fásil atu lidera Igreja iha períodu hanesan ohin loron, ne’ebé nakonu ho dezafius modernidade.

Kondekorasaun ne’e nudar simbolu, ne’ebé hatudu sentimentu agradesimentu husi Estadu ba espíritu no esforsu ne’ebé labele nega manifesta, durante tempu luta no prosesu konstrusaun Estadu hafoin Timor-Leste hetan ninia independénsia.

Dekretu-Lei númeru 20/2009, 6 maiu, mak kria Ordem de Timor-Leste, atu hatudu rekoñesimentu Timor-Leste nian, ba sidadaun nasionál no estranjeirus, iha sira-nia serbisu kontribui ba benefisiu Timor-Leste, Timoroan ka umanidade.

Igreja Katóliku sempre asume ho dignidade sofrimentu Povu tomak nian, hamriik iha Povu nia sorin defende direitus bázikus. Konstituisaun rekoñese papel Igreja nian iha luta libertasaun nasionál no hafoin restaurasaun independénsia.

Estadu Timor-Leste rekoñese no valoriza individu no institusoins, iha rai-laran no tasi balun, inklui membru kleru tanba sira nia kontribuisaun ba luta libertasaun Povu no iha prosesu dezenvolvimentu.

Dom Basílio do Nascimento hakotu-iis, iha tuku 11:45 Otl, loron 30 Outubru 2021, iha Óspital Nasional Guido Valadares ho moras kardiaku, hafoin hetan atakasaun iha Kovalima.

Asistente Editor: Saturnina da Costa