Tuir observasaun husi Online INDEPENDENTE iha terenu nota katak, sarani sira rihun ba rihun mak hein hela atu simu Amo Bispo nia isin mate.

Enkuantu, Amo Bispo Dom Basílio nia isin mate sai husi Katedral Dili iha tuku 10:45 Otl, akompaña husi Bispo na’in rua,  Padre, Madre, no Sarani sira hotu.

Bainhira to’o iha pontu entrada Nagardjon iha tuku 15:15 Otl, Padre, Madre, no sarani sira simu ho lian dadoli no mós muzika, hafoin remata, sarani sira lori Amo Bispo ba vitiza nia rezidensia iha Tirololo Baukau.

Nune’e, sarani sira hamutuk ho entidade hotu halo prusisaun husi Amo Bispo nia trezidensia mai iha Igreja.

To’o iha igreja Katedral, Veteranu sira simu Amo Bispo nia isin mate husi karu funerariu, hafoin intrega fali ba Polisia Nasional Timor-Leste (PNTL), Balatalhaõ Ordem Publiku (BOP) no mós FALINTILI-Forsa Defeza Timor-Leste (F-FDTL) husi Komponente Terestre, hodi lori Amo nia isin mate ba hatoba iha fatin ne’ebé prepara ona.

Iha tuku 17:00 sarani sira hahú lee Amo Bispo Dom Basílio nia biorgafia moris, hafoin remata iha tuku 17:10 kontinua kedas ho Misa, ne’ebé preside husi ArseBispo Metropolitanu Dili, Dom Virgilio do Carmo, SDB.  

Tuir orariu ne’ebé hato’o husi Konferensia Episkopal katak, mate isin Dom Basílio nafatin tau iha igreja Katedral hahú iha loron segunda ohin (01/11) to’o Kinta (04/11), hafoin sei halo misa, depois ba haloot Amo nia isin mate iha fatin ikus ne’ebé prepara ona iha igreja laran, husi odamatan tama ba Altar iha parte liman loos.

Entretantu, Amo Bispo Dom Basílio marka istoria durante tinan 25, nudar bibi atan ba sarani Katolika iha Timor-leste no iha tuku 11:45, loron 30 fulan Outubru, Amo Bispo husik hela mundu ne’e, ho idade 71.