Portavoz Komisaun Subvensaun Públika Marta da Cruz hatete, Politika nasionál IX Governu Konstitusionál haktuir katak Diversifikasaun ekonómika no kriasaun empregu mak sai prioridade bá Governu.
Nune'e kontinua investe iha área fundamentál sira hanesan kapitál sosial, dezenvolvimentu infraestrutura no dezenvolvimentu ekonómiku bazeia ba kuadru institusionál ida ne'ebé efikás no transparente tuir prinsipiu no valores boa-governasaun ne'ebé Timor-Leste opta.
Tanba, Baze fundamentu ne'ebé sita liubá, Sekretáriu Estadu Kooperativa re-inventa politika nasionál IX governu konstitusionál hodi aborda nia planu estratéjiku SEKoop ba tinan 2023 to’o 2028 ho vizaun ida katak harii sosiedade ida justu, prósperu no sustentavál.
"Iha planu asaun annual no planu orsamentu SEKoop tinan 2025 ne'ebé aprova ona iha Parlamentu Nasionái define estratéjia ba pola dezenvolvimentu kooperativa iha área rurál ho objetivu atu hadi'ak ekonomia familiar nu'udar ai-riin ba dezenvolvimentu ekonomia nasionál," dehan Porta Voz liu husi Konferensia imprensa ne'ebé hala'o iha Edifisiu SEKoop Akait, Segunda (27/01).
Nia hatutan, baze ba programa nasionál governu, Planu estratéjiku SEKoop no planu asaun anual ne'ebé estipula iha leten, nu'udar razaun fundamentu ba sekretaria estadu Kooperativa atu kontinua manifesta kompromisu politiku IX governu konstitusionál.
Konforme Dekretu-Lei N.º 79/2023, 11 fulan-outubru haktuir katak Sekretariu Estadu Kooperativas hetan atribuisaun atu fortalese noinsentiva movimentu, grupu, kooperativismu, asosiativismu, no mutualismu sira hodi garantia partisipasaun komunitaria hodi hasa'e Kresimentu ekonómia familiar.
Konsidera Dekretu-Lei N.º 39/2024, 27 fulan Novembru, kona-ba Regulamentu Subsidiu, Subvensaun no Doasaun Públika, ne'ebė hateten katak ezekusaun orsamentu Subvensaun Públika tenke iha transparensia no publisidade.
Iha fatin hanesan Sekretáriu Estadu Kooperativa, Arsenio da Silva Pereira hatete, SEKoop konvida proponente sira ne'ebé hakarak aplika ba iha osan refere ba ba direita Edifísiu SEKoop atu bele hatene kriteria sira ne'ebé iha ona.
"Ba proponente sira, ba benifisiu timoroan tomak sé mak hakarak aplika atu hatene ninia informasaun bele mai iha edifisu SEKoop, mai direta para bele hatene ninia kriteria ne'ebé ami prepara," dehan Governante ne'e.
Enkuantu, Orsamentu Jeral Estadu tinan 2025 ba Sekretaria Estadu Kooperativa ne’ebé Parlamentu Nasional aprova hamutuk dolar amerikanu milaun $6.058.762.
Husi montante ne’e fahe ba kategoria salariu vensimentu $2.187.870, bens no servisu milaun $1.920.892, transferensia publika milaun $1.850.000, kapital menor rihun $100.000, no kapital dezenvolvimentu zero.
Orsamentu hirak ne’e, sei finansia ba programa SEKoop nian iha tinan 2025 hanesan, dezenvolvimentu rural no urbana, funsionamentu no dezenvolvimentu instituisional inklui atividade no subprograma sira hodi dezenvolve setor kooperativa iha area rural no remontas.
