Project Manajer iha UNTL, Fernao Soares Reis, hatete, dadaun ne'e projetu refere la'o ona no foin atinje 5%.
"Laboratóriu integradu ba fakuldade ezata, ida-ne'e projetu foun, tanba ami-nia fakuldade ezata ne'e sei uza INFORDEPE, ida-ne'e foin harii iha tinan kotuk dezembru 2024 ne'e, ne'ebé agora projetu ne'e la'o hela, foin mak atinji 5%. 5% ne'e envolve husi fura bee, ho ninia side office ne'ebé sira harii ona ne'e, ho mós nia pagar ida hale'u ne'e, ne'e mak hamutuk 5% ne'e," nia dehan iha nia knaar fatin UNTL, Kinta (23/01).
Nia hatutan, projetu refere kaer husi kompañia Kabitama Unipesoal Lda, no nia durasaun tinan ida.
" Sira-nia kontratu ida halo ho UNTL ne'e tinan ida, signifika dezembru tinan ne'e foin remata, orsamentu ba projetu ne'e hamutuk rihun $899, ne'e kaer husi kompañia lokal Kabitama Unipesoal LDA. Ha'u garante sei finaliza iha dezembru, importante sira servisu iha terrenu ne'e mak tenke loron-loron",nia haktuir.
Antes ne'e UNTL nia Magnífiku Reitór Profesór João Soares Martins ho Ministru Ensinu Superior Siénsia no Kultura (MESSK), José Honório da Costa Pereira Jerónimo, tau fatuk dahuluk ba konstrusaun edifísiu foun laboratóriu integradu no edifísiu ba Fakuldade de Siénsia Ezata (FCE) nian, iha Hera, iha fulan Dezembru 2024.
Reitór UNTL hatete, universidade tau importánsia ba FCE, tanba importante tebes ba Dezenvolvimentu teknólojia Timor-Leste iha futuru ne’ebé kompetitivu.
“Lansamentu ka tau fatuk dahuluk ba edifísiu Faculadade de Ciências Ezata no laboratóriu integradu, ha’u tau importánsia ba FCE, tanba nia ezisténsia importante tebes ba nasaun nia futuru no ita mós bele iha inovasaun ne’ebé kompetitivu, liga ho siénsia teknolojia ba área siénsia bázika, enjeñaria no seluk tan”, Reitór dehan.
Iha fatin hanesan Ministru Ensinu Superiór Siénsia no Kultura, José Honório hatete, projetu ne’e investimentu ida husi IX Governu Konstitusional, nune’e ba oin la’os UNTL de’it mak utiliza maibé ba instituisaun seluk ne’ebé bainihira iha nesesidade bele uza.
“Ha’u hanoin ida-ne’e parte ida Governu hakarak investe, nune’e ba oin la’os UNTL de’it, maibé karik ministériu balun ne’ebé bele mós asesu, ne’e kompromísiu IX Governu nian hakarak apoiu. Ha’u mós hakarak agradese ba kompañia bele disponivel hodi responsabiliza ba obra ida-ne’e, hanesan ohin reitór dehan projetu barak la’o maibé kleur tanba ne’e konstrusaun ida-ne’e tenki la’o tuir ninia tempu”, Ministru hatete.
Diretora Kompaña Cabitama Unip. Lda. Amelia de Jesus Pereira hatete, kompañia hetan ona fiar husi UNTL, tanba ne’e nia fiar katak tékniku sei servisu tuir durasaun no dezeñu ne’ebé mak iha.
“Ba kompañia nia iha responsabilidade tomak, ne’ebé hetan ona fiar husi UNTL atu responsavel ba projetu ida-ne’e, ha’u-nia tékniku servisu tuir prosesu ne’ebé UNTL fó bazeia kalendáriu no dezeñu ne’ebé iha”, Diretór Kompaña Cabitama hatete.
Edifísiu ne’e ho nia luan metru 25 X Metru 23, andar tolu no durasaun ba konstrusaun durante tinan ida.
