Governante ne’e husu atu konferénsia ne’ebé sei hala’o iha tempu badak tenke tuir lei komunikasaun sosiál, liuliu artigu sira ne’ebé ko’alia kona-ba difinisaun média no jornalista.

Nune’e, mós bazeia ba estatutu konsellu imprensa nian liuliu artigu sira ne’ebé liga ho prosesu organiza konferénsia, reprezentasaun no direitu sira ba votasaun nian.

“Keta haluha katak iha lei komunikasaun sosiál dehan, sé mak iha direitu ba votu ne’e Jornalista. Portantu, rádio komunidade ne’e la’ós Jornalista, tanba sira voluntáriu i hetan transferénsia públika husi governu,” dehan Sekretariu Estadu liu husi Komunikadu ne’ebé Online INDEPENDENTE asesu iha pajina SEkomS, Kuarta (13/11).

Sekretáriu Estadu hatutan, konsellu imprensa iha responsabilidade boot atu kurize buat ne’ebé la’o sala ona iha tempu liu-ba.

Tanba, mandatu ba membru konsellieru atual na’in-lima sei termina iha inísiu tinan 2025. Nune’e, Konsellu Imprensa nu’udar órgaun ne’ebé responsavel ba prosesu ida ne’e, sei organiza konferesia ida hodi hili reprezentante jornalista na’in-rua no konferénsia ida hodi hili reprezentante média na’in-ida.

Tuir estatutu, konselleiru hamutuk na’in-lima iha konsellu imprensa, na’in-rua hili husi Parlamentu Nasionál, na’in-ida hili husi média na’in sira no na’in-rua husi Jornalista sira.

Tan ne’e, Konsellu Imprensa, nu’udar entidade administrativa independente ne’ebé atu bá iha setór komunikasaun sosiál nian.

Nune’e, Sekretáriu Estadu mós afirma katak, Konsellu Imprensa nia parseiru importante sira iha prosesu ne’e mak liuliu assosiasaun jornalista no média na’in sira.

Entretantu, sorumutu entre Konsellu Imprensa ho SEKOMS ne’e, entrega mós draf ba alterasaun lei komunikasaun sosiál ba parte rua, tanb daudaun ne’e iha faze elaborasaun no sei organiza konsultasaun públiku molok lori ba Konsellu Ministru no kontinua ba Parlamentu Nasionál.

“Ita sei tur hamutuk fali (KITL - SEKOMS) hodi haree hamutuk draf ne’ebé iha, molok ita organiza konsultasaun ba públiku liuliu ita nia parseiru sira,” Sekretáriu Estadu Expeditu hakotu.