“Ita hotu hatene katak, mídia ne’e pilar importante iha prosesu demokratizasaun iha nasaun hotu, liliu iha demokrasia ne’ebé saudavél. Ne’e duni Governu tantu se de’it, labele julga produtu mídia ida nian, tanba nia halo tuir nia knar atu ajuda mundu no nasaun hodi hetan sivilizasaun ida ne’ebé mak mais úmanu,”dehan nia iha abertura ba diskusaun Forum Nasional Editoriál, iha ambitu komemorasaun loron trajedia Balibo Five, iha Postu Administrativu Balibo, iha Munisipiu Bobonaro, sabado horseik (15/10).

Tuir nia, Mídia iha papel importante ne’ebé ema hotu hanoin no tenki konsidera hodi fó espasu, se hakarak demokrasia ne’ebé buras dadauk ne’e, iha saudavél liu. “Se ita hahú julga produtu jornalistiku, neneik ita mós sei julga ema nia sentimentu,”dehan nia.

Aleinde ne'e nia dehan, jornalista mós tenke iha hanoin ida kritiku, tanba pensamentu kritiku ne'e mak fundamenta importante atu kontribui maka’as ba iha etíka demokrasia no autor ba sivilizasaun iha nasaun ida.

“Ha'u hanoin, knaar mídia la'ós iha ne'e de'it, maibé iha fatin hotu, sempre sai autór importante iha kualker sivilizasaun mudansa úmanu iha nasaun sira," nia afirma.

Governante ne’e haktuir, aleinde, mídia sai hanesan autór sivilizadu, mídia mós tenke sai ajente ba edukadór, atu la’os sai instrumentu ba komunikasaun de'it maibé ta’es lian sira ne'ebé iha, hodi sai fontes edukativu no atu fahe matenek ba ema seluk.

Ho ida ne'e, nia husu ba jornalista sira hotu, se hili ona dalan iha mundu jornalistíku ne'ebé sai autór ba sivilizasaun, lalika tauk ba se de'it no mantein iha oin ho hanoin ida kritiku.

Liu husi forum editorial sira, jornalista sira tenke mai ho pensamentu kritiku atu se deit iha nasaun TL, labele sai dezafiu ba liberdade imprensa, liberdade expresaun ka halo individu balun tenta julga produtu jornalista.

“Minimu ha’u pessoal bele konta ba ha'u ho ita boot sira, katak, hahalok ida ne'e labele tolera, se neneik  ida ne'e mak kontinua, poezia de'it mós ema bele julga. Kuando poezia mak hetan julgamentu ona, Nasaun ida ne'e bele monu ba otoritarianizmu, tanba hahú julga ona ema nia sentimentu," tenik nia.

Entretantu, Governante ne’e hatutan, tuir survei Liberdade Imprensa iha Nivel Global, Timor-Leste iha númeru 17, maibé iha nivel Azia TL, iha númeru dahuluk.

“Ne’e signifika ita diak liu sira, signifika ita bele transmiti ita nia kelebihan sira ne’e ba nasaun sira seluk, sá tan tinan oin ita tama ba iha Nasaun Azean,”nia subliña.