Sekretariu Estadu Komunikasaun Sosiál, Expedito Dias Ximenes hatete, SeKomS liu husi Diresaun Rádiu Komunidade nian deside entrega fasilidade no ekipamentus ba iha Rádiu Komunidade hamutuk 17.
Hanesan Rádiu Raihusar-Aileu, Rádiu Tokodede-Likisa, Rádiu Vox Populy-Lospalos, Rádiu Comunidade Lian Matebian Baukau, Rádiu Comunidade Coulelemai Sahe Bucoli, Rádiu Lorico Lian, Rádiu Komunidade Manukoko Ataúro no Rádiu Iliwai Manatuto.
Nia dehan, papel Rádiu Komunidade importante tebes no konsidera hanesan liña frente ba informasaun ke presiza hetan atensaun husi Governu.
“Nune'e iha mandatu Governu dasia liu husi SEkomS hala'o ona vizita ba Rádiu komunidade balun iha leste, oeste no sentral, tanba ne'e haree katak, Rádiu komunidade sira hanesan liña frente fahe informasaun ba komunidade sira. Entaun sira hasoru problema ekipamentu no transporte,” Dehan Sekretáriu Estadu Expedito, hafoin entrega motorizada walu ho ekipamentu, iha salaun DNPDML, Kintal Boot, Sexta (29/12).
Nia haktuir, durante hala'o vizita nia rekoñese iha duni difikuldade oioin. Tanba ne'e, liu-husi orsamentu transferénsia públiku kontinua fó apoia orsamentu no ekipamentu sira inklui transporte hodi, nune’e bele haforsa liutan kobertura no programasaun sira.
Nune'e, iha orsamentu 2023 ni’an SEkomS deside apoiu ba jestór rádiu komunidade sira hamutuk millaun $10.000.000 hodi sira rasik sosa motorazada no fasilidade seluk.
“Ohin ofisialmente ha'u mai entrega motor 8 Rádiu komunidade sira-ne'ebe presiza motor, tanba sira hato'o mai katak sira persiza motor, no mos sira sosa laptop no seluk tan. Nune'e nia espera ho apoiu ne'e Rádiu komunudade sira sai matan tilun ba komunudade sira postu no baze,” Nia informa.
Nia husu, Rádiu komunidade labele haree de’it ba atividade serimoniál, maibé tenke kobre informasaun sira iha komunidade nia leet, problema sósiu-ekonómiku povu infrenta iha baze, ne'ebé presiza fó sai, nune’e kontinua hetan atensaun husi Governu.
Enkuantu, SEKomS mós toka frekuénsia Rádiu komunidade sira-ni’an ne'ebé balun ladun boot no sei organiza akordu ho RTTL,EP, nune’e bele fo-sai mos notísia no programa sira iha Rádiu komunidade ida-idak.
“Ita hein katak ho apoiu ne’ebé iha, Rádiu komunidade sira bele hala'o servisu ho di’ak no naran boot,tanba servisu ne’ebé professionál,” Tenik nia.
Molok ne'e, SEKomS asina Akordu Servisu Hamutuk (ASH) ho Jestór Rádiu komunidade hamutuk-17, iha Sala Prezidénsia Konsellu Ministru, Palásiu Governu.
Apoiu ne’ebé SEKomS fó bazeia ba avaliasaun proposta sira husi Rádiu komunidade ida-idak liuliu konsidera iha interese ba promove dezenvolvimentu komunikasaun sosiál iha Timor-Leste.
Nune’e mós apoiu ne’e, SEKomS hala’o bazeia konseitu númeru 1, Artigu 2 Dekretu Governu 1/2009 de 18 Fevereiru, kona-ba Subvensõens Publikas.
Entretantu ASH ne’e deskreve no regula ezekusaun ba transferénsia kona-ba verba sira-ne’ebé kontempla tiha ona iha Orsamentu Jerál Estadu tinan 2023, hodi fó apoiu ba Estasaun Rádiu Komunidade sira hodi hala’o atividade ba interesse jerál.
Aktividade ne’ebé entidade benefisiáriu sei implementa liuliu uza tuir regra no labele uza osan subvensaun públika atu sosa sasan ka hala’o atividades privadu ka grupu seluk nian.
Iha oportunidade, SEkomS husu ba jestór Rádiu komunidade sira hotu atu uza ho didi’ak fundus ne’ebé iha hodi hala’o servisu ho professional.
Entretantu, Rádiu komunidade hirak ne’ebé hetan benefísiu ne’e mak hanesan, Rádiu Vox Populy-Lospalos, Rádiu Komunidade Komoro, Cova Taroman Suai, Rádiu Comunidade Tokodede Liquiça, Rádiu Comunidade Antoni Lifau Oecusse, Rádiu Comunidade Maliana.
Rádiu Comunidade Maubisse Mau-Loko, Rádiu Comunidade Lian Matebean Baucau, Rádiu Comunidade 1912 Same, Rádiu Comunidade Cafe Ermera, Rádiu Povu Viqueque, Rádio Lorico Lian, Rádiu Comunidade Rai Husar Aileu
Rádiu Comunidade Lian Manu Koko Atauro, Rádiu Comunidade Difisiénsia, Rádiu Comunidade Ili-Wai Manatuto, Rádiu Comunidade Coulelemai Sahe Bucoli.
