Ministru Ensinu Superiór Siénsia no Kultura, José Honório Jerónimo hatete, atu harii Universidade Politékniku Turizmu iha Lautem, ida-ne’e MESSK  nia programa.

Tan ne’e, MESSK sei prepara tékniku atu haree dezeñu konstrusaun, prepara bolseiru sira atu ba estuda kona-ba Politékniku Turizmu ni’an no mos prepara kurikulum.

“Se ita hakarak harii Universidade tenki inisia ona bolseira sira ba iha área turizmu ni’an, kurikulum, ita mos tenki haree ninia dezeñu konstrusaun, atu nune’e banhira aprezenta iha Konsellu Ministru buat hotu preparadu, depois ida-ne’e bele implementa,” Dehan Ministru José Honório Jerónimo, iha Sentru Konvensõens Dili, Kinta (28/12).

Ministru José Honorio subliña, iha tinan 2024 sei insia konstrusaun ba Institutu Politékniku Betanu (IPB), tan ne’e ba politékniku Turizmu Lospalos sei hahú konstrusaun iha tinan 2025.

“Tan ne’e hau fó ona hanoin ba tékniku sira atu prepara kondisaun, banhira hakarak halo aprezentasaun, ita tenki aprezenta ho di’ak, tanba iha Lospalos iha rai,” Nia relata.

Ministru akresenta, MESSK kontinua fó bolsa estudu ba bolseiru atu estuda iha área turizmu ni’an, atu nune’e sira fila hanorin ona iha politékniku Turizmu iha Lautem, tanba ida-ne’e importante tebes ba MESSK.