Peskizadór AJAR, Inocencio de Jesus Xavier hatete, se sosa aimoruk mai, tanba nesésidade povu nian mak governu budu fali, haree fali ema moras ne'e Ministériu Saúde ida ne'e tenke maneira atu rezolve lalais aimoruk ne'e hodi ba ona hospitál tanba 121 item ne'ebé stock out iha hospitál nee presiza duni intervensaun husi Ministériu Saúde.
"Husu atu governu liu-liu Ministériu Saúde halo nia servisu lalais, tanba sosa tiha aimoruk depois mai rai de'it iha armajen depois la uza to'o tempu prazu ita ba fakar de'it iha Tibar ne'e fakar osan, fakar mós vida populasaun nian. Presiza duni sobu lalais aimoruk ne'ebé budu hela iha armajen INFPM, agora ninia kestaun andamentu sira prosesu. Agora ita lakohi Ministériu Saúde mós vióla regra ruma depois bele justifika fali Ministra Saúde ninia asaun ruma ne'ebé kontráriu ho norma, ne'ebé ba buat hotu-hotu sobu ka la sobu ninia prosedimentu ne'e tenke hakruuk, tenke tuir nia kuadru kegais," dehan Peskizadór AJAR, Inocencio ba jornalista INDEPENDENTE via telefone, Kinta (28/12).
Tanba, aimoruk ne'e urjente duni, se iha Dili mak 121 item laiha, oinsá ho área remota sira kuaze laiha ida ne'e tama ona violasaun Diretus Hamanus, governu sosa aimoruk mai mak la provedensia ba sidadaun sira.
Nune'e, lamenta tebes bainhira aimoruk sosa mai budu hela iha armajen INFPM la fahe ba hospitál sira, Ministra Saúde labele sa'e karreta la'o ba mai de'it, buka enkontru urjensia, Vise Ministru Saúde mós iha fortalesimentu instituisionál ne'e nia fraku ne'e iha ne'ebé atu fó diagnosa ga labele manán de'it ho sireni lian iha kapitál Dili, mas asaun laiha ne'e labele.
Molok ne'e, Diretora Servisu Apoiu Diagnéstiku Therapeutiku, HNGV, Mingota da Costa hatete, HNGV to'o ohin loron sei hasoru problema aimoruk.
"Ita nafatin husu atu INFPM tenke responde lalais nesésidade HNGV nian, tanba pedidu sira ne'e halo regulár no haruka ona ba maibé to'o agora aimoruk seidauk distribui," dehan nia iha HNGV, Kuarta (27/12).
Mingota hatete, nia parte rona Informasaun iha semana hirak ba kotuk aimoruk tama ona iha armajen INFPM.
Tan ne'e, nia husu ba INFPM atu aselera inspesaun ba aimoruk hodi bele distribui ona ba fasilidade saúde sira, liu-liu HNGV tanba pasiente sira presiza aimoruk atu halo tratamentu saúde.
"HNGV foun haruka tan pedidu ba INFPM, maibé sei hein inspesaun, espera katak halo lalais tanba moras la hein," dehan nia.
