“Akordu ne’ebé Un-Women ho SEII hala’o hodi fó ajuda ba SEII atu estabelese fatin Hakmatek, Krese ho Mini Muzeum ida ba iha partisipasaun feto no ba atividade dahuluk mak atu halo formasaun kona-ba Violénsia Bazeia ba Jéneru (VBJ),”dehan Sekretária Estadu ba Igualdade no Inkluzaun (SEII), Maria do Rosário Fátima Correia, iha komunikadu ne’ebé Online INDEPENDENTE sita, kuarta (08/02).
Aleinde, nia dehan, atividade daruak mak halo Planu Asaun Nasional Violénsia Bazeia ba Jéneru (PAN-VBJ).
Tan ne’e, UN Women mós sei suporta nafatin SEII no iha tempu badak SEII sei relata relatoriu ba CEDAW, tanba relatoriu ne’e tinan hat sei ba aprezenta iha Jenebra.
Ho nune’e, SEII dehan, governu mós ratifika ona konvensaun sira ne’e no governu iha mós responsabiidade atu relata ba iha Jenebra no hare ba iha revizaun ba Lei Kontra Violénsia Doméstika (LKVD).
Ekipa revizaun ne’e inklui mós UN Women no husi LKVD hamosu ona PAN ne’ebé halo revizaun datoluk ona no implementasaun ne’e ba tinan 12.
Ho nune’e, presiza revizaun tanba LKVD nia harmonia ho kodigu penal.
Iha fatin hanesan, Xefe UN-Women iha Timor-Leste, Nista Satyam, hatete, SEII hanesan parseiru ida ne’ebé besik liu no importante tebes ba UN-Women.
“UN-Women nia prezensa iha ne’e atu responde ba SEII nia preukupasaun hodi hamutuk ita haforsa ita nia papél iha governasaun Timor-Leste no nia atendementu ba feto no labarik-feto sira iha nasaun ida ne’e, parseira ne’e hanesan kontinuasaun husi kolaborsaun entre UN-Women no SEII ne’ebé eziste nanis ona desde UN-Women komesa hahú ninia misaun iha Timor-Leste no ida ne’e atu haforsa liutan parseiria ne’e iha areia espesífiku,”dehan Xefe Nista Satyam.
