Tuir Xefe Departamentu Empedoramentu Ekonomia, iha SEII, José do Rósario Carvalho hateten, programa husi SEII mak programa ne’ebé hakbiit ekonomia feto, hakbiit partisipasaun feto hodi foti desizaun liu-liu partisipasaun feto iha nivel ekonomia.

“Ita ko'alia liu kona-ba hakbi'it feto iha nivel ekonomia, husi SEII, ami kada tinan sempre tau orsamentu fundo tranferensia públika ka fundu rotativa ba iha ita nia komunidade sira," dehan nia ba jornalista sira, hafoin partisipa seminariu ida, iha edifisiu Fokupers, Farol, kuarta ne’e (19/10).

Nia hatutan, hahú husi tinan 2021 to'o iha tinan ne'e, SEII tau orsamentu purvolta dolar amerikanu rihun U$300 resin ba grupo vulneravel sira iha territoriu nasional.

"Iha tinan ne'e, tau hamutuk osamentu ho montante rihun $300 husi osamentu fundo tranferensia públiku ne'ebé foku liu ba iha grupo organizasaun naun governamental no mós ba vulneravel sira iha territoriu nasional,”nia dehan.

Enkuantu, nia esplika, iha fundo osamentu, ne'ebé aloka ba grupu sira, iha parte tolu, ida apoiu duni ba grupu sira uza mekanismu rotativa.

Tuir nia, apoiu fundo rotativu signifika katak, apoiu osamentu ba iha grupu bazeia ba akordu to'o tinan rua.

“Entaun purezemplu iha akordu ne'e, kada grupu ida simu dolar amerikanu rihun $2, bazeia ba akordu, to'o tinan rua tenke entrega fali ba grupu seluk iha fatin no suku ne’ebé hanesan,”tenik nia.

Nune'e, daruak mak apoiu ba iha grupu NGo sira, tanba iha programa sira ne'e implementa ba iha programa vida politika no violensia bazeia ba jéneru.

Ba datoluk, nia dehan, ba grupu vulneravel sira, SEII entrega osan ba sira halo negosiu maibé laiha funan, no osamentu ne'e fó ba sira, implementa deit laiha iha rotativa", tenik nia

"Ida tan mak iha Implementasaun osamentu ne'e mós ita uza ba iha grupo vulneravel sira, tanba grupo vulneravel la implementa ho programa ida rotativa, ida ne'e fó sai iha públiku mak foin grupo vulneravel sira, entaun sira mai hatama proposta. Bainhira grupo vulneravel sira prepara ona proposta tenke kolabora ho autoridade lokal sira hodi asina, no proposta bele lori mai submete iha SEII,”haktuir nia.

Ho nune’e, iha tinan ne'e, total grupu hamutuk 135 kompostu husi Grupu NGO neen (6), grupu vulneravel 14 no grupu seluk tan, ho osamentu hamutuk rihun $300.

Nune'e, husi SEII nia politika sei fasilita formasaun ba grupu sira, maibé sei halo koolaborasaun hamutuk ho parte organizasaun naun governamental nasional sira inklui IADE hodi fasilita formasaun ba sira ne'ebé asesu ba fundo rotativa ne'e.

Nia fundamenta, fundo rotativa ne'ebé fó ba Organizasaun Naun Governamental sira, hodi tau matan ba asunto violensia bazeia ba jéneru, asuntu feto no labarik feto no mós sobrivivente sira.

Enkuantu, tuir dadus, grupu ne'ebé halo ona fundo rotativa husi munisipiu RAEOA, iha grupu ida (1), Baukau ida (1), Bobonaro ida (1), Lautem ida (1). Grupu sira ne’e susesu ona no konsege fó fali osan ba grupu seluk.

Entretantu, iha programa SEII nian hodi hakbit feto iha ekonomia, tau mós importansia ba ema ho defisiensia asesu ba fundo refere.