Tuir Diretór Jéral MSSI, Florencio Pina Dias Gonzaga hateten, programa Bolsa da Mãe Jerasaun Foun, implementa bazeia ba dekrtetu lei númeru 2/2021, ne'ebé hahú implementa tinan ne'e, iha Munisipiu Ainaro, Bobonaro no Rejiaun Administrativu Espesial Oekuse Ambeno (RAEOA).
Programa refere, hola parte hodi redus ki'ak no mal-nutrisaun no mós haforsa ekonomia uma laran ba ema vulneravel sira.
Nia dehan, benefisiariu ba BdM-JF mak inan isin rua ne’ebé vulneravel no mós bebe ho idade 0-6 no ema ho defisiénsia sira.
“Iha Oekuse pagamentu la’o hela, tanba ita halo akordu ho kompaña telkomcel, agora iha Munisipiu Bobonaro no Ainaro, prosesu la’o hela no orsamentu ita konta hela, ema nia direitu sei la lakon. Maibé pagamentu bainhira la’o benifisiariu tenki iha BI no kartaun eleitoral,”dehan nia iha salaun Fokupers, Farol, Dili, kuarta ne’e (19/10).
Nia esplika, maioria benefisiariu iha Munisipiu Ainaro no Bobonaro seida’uk bele loke konta bankaria, tanba dokumentus seidauk kompletu.
"Ita koordena ho Ministeriu Justisa, espera katak iha tempu badak buat hotu-hotu resolve, pagamentu liu husi banco sei la'o no benefisiariu sei hetan direitu," tenik nia.
Nia hatutan, prosesu pagamentu iha failansu, tanba atraves husi Banco Nasional Komersiu Timor-Leste (BNCTL), tanba persija dokumentu.
“To'o agora ita sei iha faze diskusaun hela, bainhira dokumentus kompleta, bele halo pagamentu, maibé sei buka alternativu atu hare kona-ba benefisiariu nia konta bankaria no seluk tan,”dehan nia.
Entretantu, tuir dadus husi husi MSSI, total benifisiariu BdM-JF iha Munisipiu Ainaro, Bobonaro no RAEOA hamutuk 4.015 no defisiénsia hamutuk na’in 97.
Husi númeru ne’e na’in 5.477 husi RAEOA, Kompostu husi inan isin-rua 556 ho nia osan $8.340,00, labarik 4.905 ho nia osan $98.100,00 no labarik defisiénsia hamutuk na’in-16 ho nia osan $160,00.
Aliende, benefisiáriu husi Ainaro no Bobonaro nian to’o fulan agostu hamutuk inan isin-rua 832, labarik 6.318 no defisiénsia 11.
Nune'e, ba inan isin-rua sira sei simu $15.00 kada fulan, enkuantu ba labarik husi tinan 3 mai kraik sei simu $20,00 kada fulan no suplementu adisionál ba labarik ho defisiénsia $10,00 kada fulan.
