Xefe Departamentu Empodermentu Ekonomia Feto-SEII, Francisca de Sousa hateten programa ne'e sai hanesan programa prinsipal liu husi fundu transferensias publikas ne'ebé kada tinan SEII fó apoiu ba grupu vulneravel no grupu feto kbit laek sira.
"Maske kikoan mais ami kontinua apoiu no suporta tinan tinan, maske nia grupu avansadu ona mós ami kontinua suporta atu nune'e sira bele iha rendimentu rasik maske sira iha uma de'it maibé sira bele kria buat ruma hodi bele hetan rendimentu,”dehan nia ba Online Independente iha Lecidere ohin.
Nia hatutan, dadauk ne'e SEII liu husi pontu vokal sira iha Munisípiu halo hela akompañamentu no selesaun dokumentus ba grupu feto sira iha area rural hodi bele asesu fundu rotativa.
“Ami iha pontu vokal iha Munisípiu hotu sira mak fahe informasaun, sira mak identifika feto vulneravel sira, feto ne'ebé hakarak halo atividade negósiu ne'e liu husi sira ne'ebé proposta mós sira tenke assina, iha sira nia koñesimentu. Minimal grupu ne'e ema na’in lima feto ho mane bele involve hamutuk familia uma laran ka husi suku ne'e nia laran,”dehan nia.
"Iha tinan kotuk ami hahú ho programa pilotu ba fundu rotativu ne'e iha grupu balun ne'ebé sira la'o ho kapás duni sira fó ona sira nia modal osan ne'ebé sira simu ne'e sira entrega fali ona ba grupu seluk tanba hanesan ohin ne'e nia dulas lalais no fó rendimentu lalais”.
Nia esplika, atividade sira ne'e hanesan simpan pinjam, sira foti no ema fó fila ho funan entaun lalais liu fulan tolu de'it sira bele entrega ona ba ema seluk, grupu ne'e iha oekuse no Maliana kuaze pilotu la'o di'ak liu.
Alende ne'e mós iha grupu produsaun hanesan kuda ai-han, produtu lokal, hakiak manu no hakiak fahi. Kada tinan SEII halo feira ba grupu sira ne'ebé apoiu no iha produtu di'ak.
"Iha tinan ida ne'e ami halo hela selesaun ba dokumentu sira maibé ami fokus liu ba suku sira ne'ebé mak seidauk hetan oportunidade liu, ne'e suku hirak ne'e ami fo prioridade atu bele asesu ba fundua transferensias publikasaun nee,”katak nia.
Nia hatutan, iha selesaun ne'e SEII sei haree liu ba grupu feto sira ne'ebé atividade ekonómiku bele hatama rendimentu lalais atu nune'e bele forma fila fali grupu seluk iha suku laran ho nune'e osan rotativu bele la'o lalais tanba iha grupu seluk hein hela.
