Xefe Departamentu Kapasitasaun Ekonomia Feto-Sekretáriu Estadu Igualdade no Inkluzaun (SEII), Francisca de Sousa hateten, durante ne'e SEII rejista ona kazu violensia domestika barak maibé ikus mai la kontinua prosesa tuir dalan legal no deside rejolve de'it tuir familia.

"Feto barak serbisu laiha, osan laiha, koñesimentu ba planeamentu familia laiha entaun nia oan hela deit. ikus mai amaun kuandu tuku tebe ba tiha polísia, nia (mane) ameasa fali ha’u tama tiha komarka se mak sei fó han oan sira, ha'u sai fali mai sa o hela de'it naran depois mak o haree,"haklaken nia bainhira sai ordor ba semináriu hodi komemora Loron Internasionál Direitos Umanus iha Xanana Riding Room ohin Kinta(10/12).

Tuir nia katak, feto kontinua laiha lian tanba feto nia moris sei dependénsia ba mane. Ida ne’e sai hanesan presaun ba feto, tanba laiha servisu atu halo tratamentu ba oan nia futuru.

“Komesa hanoin barak ona ha'u nia laen kuandu tama komarka entaun ha'u nia oan ida hitu, walu ne'e sé mak atu fó han, entaun too ikus nia dehan laiha buat ida ita ba rejolve tuir familia deit,”nia haktuir.

"Ida ne'e akontese, ema ne'ebé keisa barak maibé too ikus ida ne'ebé prosesu ne'e nia persentajen tuun tanba feto dependente ekonomia ba mane sira”.

Tanba ne’e liu husi programa SEII nian ba tinan ida ne’e atu apoiu osan ba grupu feto sira halo negosiu rasik.

Liu husi politika ida ne’e, SEII espera katak bele redus feto nia dependénsia ba mane iha vida ekonomia familiar.

SEII sei fó apoiu fundu rotativu ho montante husi $1000 too $2000 ba grupu feto hamutuk 24 iha area rural sira ne’ebé seidauk hetan oportunidade atu bele hadia sira nia ekonomia rasik.