Hafoin hasoru deputadu komisaun F, portavoz reklamante Simão Ximenes informa, uma-kain 1.400 husi aldeia 14 iha Suku Komoro mak to’o ohin loron seidauk simu subsidiu $200.

Tan ne’e, nia hatete, sira mai hasoru-malu ho reprezentante povu iha PN hodi hato’o sira-nia lamentasaun.

Tuir nia, governu halo diskriminasaun ba implementasaun subsidiu $200, tanba uma-kain balun hetan, maibé balun la hetan.

“Balun governu fó no balun governu lakohi fó, tanba ida ne’e mak reklamante sira mai diretamente ba reprezentante povu iha uma fukun Parlamentu Nasional atu bele buka solusaun,” dehan nia hafoin hasoru-malu ho Komisaun F trata asuntu Saúde, Seguransa, Sosiais no Igualidade Jeneru, iha PN, Segunda (14/12).

Durante hasoru-malu ho komisaun F, iha komunikasaun direta via telefone ho Diretór MSSI no Diretor ne’e promete atu halo pagamentu ba reklamante sira iha semana ne’e nia laran.

“Ami hein, komesa Tersa to’o Sesta, semoga sira halo pagamentu, se karik Tersa to'o Sesta agora mak sira seidauk halo pagamentu, deputadu sira hatete bele fila mai hato'o nafatin iha parlamentu nasional,” nia hatete.

Iha sorin seluk, komunidade Aldeia Moris Foun, Suku Komoro Ferdi Alsino dos Santos hateten, subsidiu $200 ba kada uma-kain hanesan programa nasional, tan ne’e povu tomak iha direitu atu hetan.

"Ami povu la'ós ami laiha serbisu ka laiha hahán mak ami ezjije maibé ida ne'e direitu Timor-oan nian tomak, programa ne'e programa nasionál ne'ebé ami nu'udar povu ami sente ladún satisfas tanba atendimentu ba ami ladún di’ak"  dehan nia.

Iha fatin hanesan, Sekretaria Komisaun F, Helena Martins Belo hatete, reklamante sira preokupa, tanba governu seidauk fó sira-nia direitu.

“Sira preokupasaun no ejize subsídiu  $200 kada uma-kain. Tanba loron 15 ne’ebé promete ona ba sira liu tán tiha ona, mai tan ba fulan 6, sira laós mai direita iha ne’e, maibé sira ba duni konfirma iha autoridade sira, maibé la fó resposta klaru ba sira,” dehan nia.

Nia dehan, nunee mós sira iha semana rua liu ba sira ba hasoru MSSI maibé la fó resposta klaru ba sira.

“Ohin dere (telefone) Diretór MSSI hatan loos, tanba sira nia kartaun eleitoral ne’e mak halo komplikasaun uitoan, naran ne’e kuaze hanesan, tanba ne’e agora sira halo verifikasaun, MSSI ho Ministériu Administrasaun Estatal. Agora dadaun iha rihun 12 resin mak sai ona, espera katak sira-nia naran bele tama ona,” nia hatete.

Iha fatin ketak, Xefe Suku Komoro, Eurico da Costa de Jesus hatete, total reklamante suku Komoro nian hamutuk uma-kain 1.222, laos uma-kain 1.400.

“Ha’u hatete ba sira katak ha’u telefone ona ba MSSI, maibé naran husi Ministériu Administrasaun Estatal seidauk tuun, tanba kuandu tuun ona, sei lori mai taka iha sede suku,” dehan nia via telefone.

Nia hatete, parte MSSI fó ona resposta katak prosesu pagamentu ba reklamante sira sei hala’o iha fulan Dezembru nia laran.

“Mais sira tenke hein, tanba sira-nia naran sei iha hela verifikasaun laran, kuandu hotu ona, naran sei taka iha sede suku,” dehan nia.

Xefe Suku ne’e hatutan, nia esplika ona ba reklamante sira kona-ba prosesu ne’ebé la’o, maibé sira la fiar tan ne’e sira ba halo konfirmasaun no hato’o keixa ba PN.

“Prosesu mak demora, ohin xefe suku hatete ona, ‘imi ba kesar ne’e imi livre, a vontade, tanba espresaun livre, direitu imi nian, maibé xefe suku esplika ona katak sasan ne’e demora iha leten, tanba verifikasaun sei kleur uitoan’,” Eurico esplika.