Iha 2 Janeiru 2024, Diretór Jeral Diresaun Jeral Servisu Rejistu Notariadu (DJSRN), João Fernando Martins Borges hasai avizu ida katak hahú iha 3 Janeiru, DJSRN la halo atendimentu ba pasaporte komun tanba stock kaderneta pasaporte hotu.

Anunsiu husi DJSRN ne’e hamosu preokupasaun no lamentasaun husi públiku.

Ba kestaun ne’e, maske tuir kontratu entre Ministériu Justisa (MJ) ho kompaña ne’ebé prodúz kaderneta pasaporte katak iha fulan Janeiru 2024 kaderneta pasaporte rihun 52 sei to’o iha Timor-Leste, maibé parte Ministériu Justisa (MJ) la brani fó serteza.

Diretor Jeral DJSRN hatete, provizoriamente notariadu hapara atendimentu ba pasaporte to’o kaderneta pasaporte 52.142 to’o iha Timor-Leste.

"Ita hein kuandu pasaporte foun tama ami sei informa fali ba públiku sira. Ha'u labele fó sai uluk nia data no fulan maibé ita hein, kuandu mai ona ami sei informa fali ba ita-boot sira,” dehan João iha nia knar-fatin, Kuarta (03/01).

Nia hatutan, normalmente servisu ba kaderneta pasaporte ne’e liga ba aprovizionamentu MJ nian. Maibé tuir kontratu, pasaporte 52.142 sei mai iha fulan Janeiru ne'e.,

"Maibé ita hein bainhira mak pasaporte foun ne'e mai," katak nia.

Iha Parlamentu Nasionál, deputadu husi bankada Fretilin, Joaquim dos Santos hatete, prosesu ba kaderneta pasaporte ne’e difísil duni, tan ne’e husu sidadaun sira atu pasiensia hodi hein.

Nia dehan, problema kaderneta pasaporte ne'e desde Governu Daualu. Iha momentu ne’ebé governu husu ba kompaña prodúz no haruka uluk kaderneta pasaporte rihun 16 mai Timor-Leste.

Ho nune’e, iha governu dasia kaderneta pasaporte rihun 16 ne’e konsege to’o iha Timor-Leste. Maibé, iha inisiu tinan 2024 kaderneta hotu fali ona.

"Tuir loloos ne'e antes pasaporte rihun 16 atu hotu, governu tenke hatene ona pasaporte sei bele to'o bainhira, entaun sira rekomenda kedas ba kompaña hodi produs lalais, labele demora tanba povu presiza," katak nia.