Eskola Ensinu báziku Filiál nu. 05 Komoro iha tinan 2024, kontinua halo kobransa ba kada estudante ho montante dollar Amerikanu tolu nulu resin ida ($31.00), ho razaun atu sosa uniforme ka farda eskola nian.
Koordenadór EBF 05 Komoro Anacleto Martins hatete, EBF 05 halo kobransa ba estudante sira ho razaun atu sosa farda, tanba molok sirkulasaun husi Ministériu Edukasaun (ME) fó sai eskola halo tiha ona konkordánsia ho kompaña ne’ebé sei suku farda.
Kordenadór dehan, eskola halo tiha ona konkordánsia ho kompaña iha loron 12 Outubro tinan 2023, tan ne’e bainhira sirkulasaun ne’e tun eskola nafatin kontinua halo kobransa tanba eskola refere lakohi atu foti kulpa.
“Antes sirkular ne’e tun ami hakat liu tiha ona, ami hameno ona fardamentu ba labarik sira hanesan babain iha tinan sira uluk ne’e, ami hein hela maibé sirkulár ne’e mai tarde, entaun hakarak ka lakohi konkordánsia ne’ebé ami halo ona kompaña nafatin kontinua tanba lakohi atu kulpa ida nee,” dehan Kordenadór iha nia knaar fatin Komoro, Kinta (04/01).
Koordenadór afirma, tan ne’e ho orsamentu ne’ebé iha eskola sei halo fila-fali enkontru ho inan-aman husi estudante nia atu nune’e orsamentu ne’ebé iha bele rai karik fardamentu ne’e to’o iha eskola.
Tuir konkordánsia entre eskola Ensinu Báziku Filiál (EBF) nu. 05 Komoro ho kompanha katak, sei suku farda ba estudante nia kuantidade hamutuk 300 liu.
Anacleto Martins argumenta, eskola la’ós la kumpri sirkulasaun husi ME maibé, sirkulasaun hatun tarde, tan ne’e banhira ekipa ME halo inspesaun haruka eskola divolve fali estudante sira osan eskola kumpri maibé Ministériu mos tenki haree ba data sirkulasaun ne’e.
“Se karik halo inspesaun bele, tanba buat ida nee laos eskola ida deit maibé nee iha teritoriu tomak halo ona konkordánsia katak sei devolve ami nafatin pronto devolve maibé Ministeriu tenki hanoin katak sirkular tun ohin ita labele realiza, tan nee tenki hatun antes,” nia hato’o.
Nune’e mós nia dehan katak, sei hamutuk ho profesór sira seluk iha teritóriu laran tomak atu hamrik hodi koalia ho IX Governu liu husi Ministériu Edukasaun atu nune’e banhira halo programa ruma tenki halo uluk sosializasaun hafoin foti desizaun, labele hamosu sirkular derepenti deit.
Iha sorin seluk, Diretór Servisu Munispiu Díli, Carlito da Silva hatete, Ministériu Edukasaun hatun ona sirkular ho nu. 262/XII/SE-ESG-ESTV/2023 katak eskola labele labele ejize pagamentu osan nian ba estudante foun sira iha kualkér razaun hanesan propinas, farda, materiál no seluk tan.
Diretór dehan, estadu bandu liliu ba eskola públiku sira labele halo kobransa, karik iha parte balun ne’ebé entre inan-aman estudante nian ho profesór sira konkordánsia liu husi akta ruma ba aktividade balun inspetór sira sei ba halo inspensaun hodi haree.
“ha’u hanoin no ha’u hatene katak sei iha dezafiu balun ne’ebé iha eskola sira, tan nee ita hatun desizaun seluk sira halo desizaun seluk, sansaun saida mak atu fó ba sira no klaru katak iha sirkular ne’e deside ona.” Diretor hakotu.