Uma-kain 84 ne’ebé pertense ba aldeia Narun-teinu to’o ohin loron sei hein bainhira loos mak sira bele haree naroman eletrisidade iha tempu kalan.

Xefe Juventude Aldeia Narun teinu, Sejaltino Amelio informa, desde tempu okupasaun Indonezia to’o ohin loron, komunidade sira iha aldeia ne’e seidauk haree hetan naromak husi eletrisidade.

Iha tempu ukun an, nia dehan, iha ona planu husi governu atu dada eletrisidade ba aldeia ne’e, maibé seidauk konsege tanba problema hada’u-malu projetu husi pesoal veteranu balun.

"Governu troka malu, depois veteranu sira mós dada-malu, afeta ba ami komunidade sira to'o ohin loron ami la asesu eletrisidade," dehan nia ba jornalista INDEPENDENTE, iha nia hela-fatin, Narun-teinu, Sabadu (30/12/2023).

Ho governu dasia ne’ebé lidera husi Primeiru Ministru, Kay Rala Xanana Gusmão, esperansa komunidade sira atu hetan naroman buras hikas.

"Ba naroman nian governu bele tau-matan lalais ona par ami mós bele sente hanesan maluk sira ne'ebé hela iha Vila laran no ami-nia (aldeia) sorin sira ne'e par labele iha diskriminasaun ba ami sira iha area remotas sira ne'e," dehan nia.

Iha parte seluk, Xefe Suku Mahina I, Martino Junior Pinto hatete, iha suku Maina I, iha aldeia tolu mak seidauk asesu eletrisidade, mak hanesan: aldeia Narun-teinu ho uma-kain 84, aldeia Maubedara ho uma-kain 35, no aldeia Pajahara ho uma-kain 80.

Iha tinan 2022, nia dehan, husi parte EDTL foti ona dadus no hein katak bele implementa ona.

"Aldeia Narun-teinu ne'e EDTL foti ona dadus, sei dada husi Postu Luro nian ba iha ne'ebá," dehan nia.

Entretantu, Administradór Munisipu Lautem, Domingos Savio hatete, iha munisipiu Lautem hela aldeia 22 resin mak seidauk asesu eletrisidade, inklui aldeia tolu iha Suku Mahina I.

Nia dehan, dadus iha ona EDTL no hein katak iha tinan 2024 ne’e sei hahú dada eletrisidade ba komunidade sira iha aldeia hirak ne’ebé seidauk asesu.

Husu governu konstrui ponte

Komunidade sira husi Aldeia Narunteinu ne’ebé fronteira ho Postu Administrativu Luró husu ba Vise Primeiru Ministru, Ministru Koordenador Asuntu Dezenvolvimentu Rurais, Mariano Assanami Sabino, atu halo konstrusaun ba ponte ne'ebé sempre ameasadu iha tempu udan.

"Alto Laleno ne'e baliza besik malu ho Luró, Vise Primeiru Ministru (Assamani) mós hatene, ne'ebé sai rai-nain oinsa par bele haree parte rua ne'e par iha dezenvovimentu ba ita-nia inan-aman sira, bele asesu ponte ne'ebé tinan barak komunidade hasoru, tanba tinan kotuk mota lori estudante mane ida seidauk hetan nia isin to'o agora," dehan Xefe Juventude Aldeia Narunteinu, Sejaltino Amelio.

Problema boot ba komunidade sira iha suku rua ne’e mak mota tolu ne'ebe haleu sira tanba laiha ponte nune’e sempre fó ameasa ba sira iha tempu udan.

Iha parte seluk, Xefe Suku Mahina I, Martino Junior Pinto hatete, nia parte sei buka meius atu provizoriamente halo intervensaun nune’e komunidade sira bele asesu ba ponte.

Nia parte hato'o ona ba Administrador Lautem atu labele hein to'o dezastre mosu mak halo intervensaun.

"Entaun di'ak liu ita atua lalais tiha lai mak buat sira ne'e mosu duke problema ne'e mosu mak foin ita ba atua ne'e todan tanba dezastre ne'e ita labele hein tanba agora tempu udan," dehan nia.

Ba kestaun ne'e, Administrador Munisipiu Lautem, Domingos Savio hatete, tinan 2024 nia parte sei esforsu hodi halo ponte provizoriu ba aldeia Narun-teinu.

"Sira ne'e tinan (2024) ida ne'e mak foin ita halo ponte oan ne'e, maibé mota (boot) ne'e Munisipiu Lautem la hetan orsamentu ba manutensaun," dehan nia.