Vise Diretór Asosiasaun HAK, Antonino Delimas hatete, governu presiza tetu atu bele estende tan kontratu ho kompaña sira hodi oferese foos ho folin ne’ebé baratu liu ba povu Timor-Leste, liu-liu sira ne’ebé kbiit laiha.

"Ami husu governu presiza estende tan subsidiu foos, tanba ita haree situasaun, kapasidade kompra husi populasaun maiória la naton, folin foos iha merkadu kontinua sa'e maka'as,” dehan Antonino ba jornalista sira iha nia kna'ar-fatin, Faról, Kuarta (03/01).

Bainhira atu estende subsídiu ne’e, nia sujere atu fó de’it ba komunidade sira ne’ebé laiha kbiit atu sosa foos ho folin ne’ebé karun liu.

"Asosiasaun HAK atu hatete ba governu, liu-liu Ministériu Komérsiu Indústria, karik se iha hanoin atu apoiu komunidade sira kbi'it la'ek, entaun tenke identifika sira ne'ebé laiha forsa duni, se la'e temi subsidiu mais fó subsidiu ba ema sira kbi'it iha.”

“Nune'e mós ita fó subsidiu ba kompañia, ita la'ós fó subsidiu ba konsumidór sira. Ita hanoin atu rezolve kbi'it la'ek sira-nia problema, liu-liu asesu ba ai-han, sosa foos, entaun tenke halo identifikasaun ne'ebé di'ak, iha númeru ne'ebé loos, se atu faan foos karik apoiu ba ema sira ne'ebé kbi'it la to'o atu sosa ho folin karun, agora sira ne'ebé kbi'it iha bele kompras iha loja sira," nia afirma.

Molok ne’e, Vise Ministru Komérsiu no Indústria, Augosto Junior Trindade informa, iha 29 Dezembru 2023, tuku rua kompaña remata ona faan foos subsidiu $9 hodi prepara relatóriu atu submete ba MKI.

"Aban (29 Dezembru) tuku rua sira para ona, tanba ami mak husu sira para lai atu prepara relatoriu tanba akhir tahun buat sira ne'e tenke kompletu," dehan Vise Ministru ne’e.

Hatan ba karik subsidiu ba foos ne’e sei kontinua iha tinan 2024, nia dehan, ida ne’e depende ba situasaun.

"Ita-boot (jornalista) mós bele husu MAPF ‘produsaun oinsa?’, so hanesan ne'e mak ita bele trava (subsidiu foos), se lae susar," dehan nia.