Prezidente Repúblika (PR), José Ramos-Horta hala’o enkontru semanál iha primeiru semana fulan Janeiru 2024 nian hodi avalia situasaun segurasan iha Timor-Leste.
“Ha’u rasik ho Primeiru-Ministru halo apresiasaun avaliasaun kona-ba situasaun seguransa durante periodu natál, ami-nia observasaun liu hosi autoridade polisia no autoridade sira seluk iha munisipiu. Iha ami nia observasaun rasik buat hotu- hotu la’o di’ak no situasaun seguransa kapas loos, komportamentu povu no joven sira nian mós di’ak tebes no fó parabéns ba povu no joven sira no agradese mós ba ita-nia autoridade seguransa sira,” dehan PR Horta iha resintu Palasiu Prezidensiál Dili.
Iha fatin hanesan, Primeiru-Ministru Xanana Gusmão agradese situasaun seguransa la’o di’ak, mezmu mosu kazu krime ema deskoñesidu oho juventude balun iha Maliana-Bobonaro no kazu ne’e PNTL Bobonaro hala’o hela prosesu investigasaun kle’an.
“Ha’u hatene katak, ita hotu kontente hosi natál mai too fin do ano kalma teb-tebes. Ida ne’e maka halo prezidente repúblika rasik temi dehan, juramentu ne’ebé PNTL no F-FDTL halo ne’e influensia teb-tebes ba joven,” dehan PM Xanana.
Durante enkontru, Xefe Governu Xanana atualiza mós ba PR Horta kona-ba populasaun, lia nain no xefe suku na’in- 18 hosi Postu Administrativu Bobonaro, Munisipiu Bobonaro realiza serimónia rituál “NAHE BITI BOOT BA DAME” ho juramentu ba natureza hodi lori juventude sira hosi Grupu Arte Marsiál (GAM) Grupu Arte Rituál (GAR) hadame malu no simu malu hikas ona iha loron 28 dezembru 2023.
Juramentu ba natureza no oho animal, manu ida, karau ida no bibi ida, look bua no malus no hemu tua lulik ne’ebé tau animal nia raan hodi fó hemu ba reprezentante GAR no GAM suku 18 hodi promete la kria tan konflitu ba malu hahú ohin no ba futuru.
“Ha’u ba to’o Lourba no Carabau ho lian nain, no lider Arte Marsiál sira tuur hamutuk halo juramentu buat hotu la’o kapas. Ne’e duni ita hotu husu klima ida paz, domin ho dame bele la’o tinan 2024 tomak, para ita bele preokupa ho buat di’ak ne’ebé ita atu halo ba rai ida ne’e,” tenik PM.
Alende ida ne’e, PM Xanana apresia boot ba juventude ne’ebé iha loron 31 dezembru kalan partisipa festa simu tinan foun 01 Jeneiru 2024 iha sidade Dili no munisipiu sira la mosu kazu krime ruma.
Iha enkontru ne’e, PM Xanana no PR Horta deskute mós hanoin di’ak sira atu konvoka enkontru Konsellu Superiór Defeza no Seguransa atu halo avaliasaun seguransa tinan ne’e no haree mós planu no programa ne’ebé forsa rai rua (Indonézia - Austrália - red) atu hadia nasaun ne’e.
Iha parte seluk, Xefe Governu Xanana hato’o agradese ba PR Ramos-Horta ninia inisiativa hodi organiza juventude sira halo prezépiu iha Palásiu Prezidensiál hodi hasa’e no promove valór moris sarani Katolika sira nian iha Timor-Leste.
